Kooxda Xuuthiyiinta ee fadhigeedu yahay dalka Yeman, ayaa weerar madaafiic ah ku qaaday mid ka mid ah magaalooyinka ixtilaalka Yahuudda ku hoos jira ee Falastiin, halkaas oo khasaare kala duwan lagu gaarsiiyay maamulka sahyuuniyadda.
Afhayeenka kooxda Xuutiyiinta Yeman, Yaxye Sariic ayaa sheegay in guutooyinkiisa madaafiicda ay saaka weerar ku qaadeen gumeystaha, iyagoo gantaallo ku garaacay xarunta Yahuuda ee Tal’abiib iyo bartamaha dhulka ay xoogga ku heystaan, ninkan ayaa sheegay inay si gaar ah u beegsadeen bartilmaameedyo militari iyagoo adeegsanaya gantaal ballistic ah, kaasi oo kaliya dhowr daqiiqo uu sheegay inay ku qaadaray gaarista bartilmaameedka oo ah masaafo dhan 2,040 oo Kiiloomitir.
Wuxuu ku goodiyay inay fulin doonaan weeraro kale oo beegsada maamulka gumeystaha, sawiro iyo muuqaallo lasoo dhigay baraha bulshada ayaa muujinayay qiic iyo uuro madow oo ka kacayo goobaha ay beegsadeen Xuuthiyiinta, khasaare kala duwan ayaa lasoo wariyay in uu Yahuudda kasoo gaaray weerarkan.
Wuxuu ku faanay in gantaalkan uu ka gudbay dhamaan qalabka digniinta bixiya ee maamulkaas, taasi oo noqotay fashil amni oo ku habsaday maamulka sahaayinda, waxaa lasoo sheegay in xitaa nidaamka difaaca hawada uusan bixin wax digniin ah, kaliyana laga war helay gantaalkaasi oo ku dhacaya meel u dhow Tal’abiib.
About The Author
