Qaraxyo waaweyn ayaa caawa laga maqlay magaalada Beledweyne ee xarunta gobolka Hiiraan kuwaas oo lala beegsaday mas’uuliyiin iyo siyaasiyiin ka tirsan DFS iyo maamul goboleedka HiirShabelle.
Mid ka mid ah qaraxyadan ayaa ka dhacay gudaha xerada Lama Galaay ee ku taalla duleedka magaalada Baladweyne, halkaas oo ay ka socoto abaabulka doorashada kuraasta taalla magaalada Baladweyne sidoo kalena ay degan yihiin siyaasiyiinta iyo mas’uuliyiinta u sharraxan kuraasta xilldhibaanimo.
Qaraxa labaad ayaa isna ka dhacay banaanka xerada, halkaas oo lagu beegsaday ciidamo iyo saraakiil gurmad ahaa oo soo gaaray xerada markii uu dhacay qaraxii koowaad.
Tobanaan isugu jira siyaasiyiin u sharraxnaa xildhibaanimo, mas’uuliyiin ka tirsan DFS iyo kuwa HiirShabelle oo ay ku jiraan xildhibaano hadda jooga iyo kuwa hore, waziiro ka tirsanaa xukuumadihii dalka soo maray ayaa ku dhintay, kuna dhaawacmay qaraxyadaas sida ay noo xaqiijiyeen ilo wareedyo lagu kalsoon yahay.
Xarakada Shabaabul Mujaahidiin ayaa sheegatay mas’uuliyada qaraxyadan iyagoo sheegay inay qaraxyo ka fuliyeen xerada Lama Galaay oo ay joogeen xubno katirsan murtadiinta. sida lagu sheegay war kasoo baxay taliska ciidamada Al-Shabaab.
Xerada Lama galaay oo ah halka qaraxyadu ka dhaceen ayaa aad ugu dhow xarunta maamulka gobolka Hiiraan, waxaana ay ka mid tahay goobaha aadka loo ilaaliyo ee ay ka socoto abaabulka doorashada, sidoo kalena degan yihiin siyaasiyiinta kuraasta xildhibaanimo u soo raadsaday magaaladaasi.
Bishii lasoo dhaafay ayey ahayd markii sidan oo kale qarax xoogan oo ka dhacay Baladweyne lagu dilay mas’uuliyiin kala duwan oo katirsanaa maamulka HiirShabelle oo u uu ku jiray gudoomiye ku xigeenkii maamulka gobolka Hiiraan, iyo siyaasiyiin u sharraxnaa kuraasta xildhibaanimo ee taalla gobolka.
About The Author
