Saraakiisha maamul goboleedka ashahaada la dirirka ah ee Puntland ayaa sheegay in uu faraha kasii baxay amniga magaalo madaxda maamulkaasi ee Garoowe, ka dib markii ay magaaladaasi kusoo kordheen kooxo hubeysan oo ka ganacsada waxyaabaha maanka dooriya.
Sargaal u hadlay maamulkan ayaa sheegay inay maaro u la’yihiin kooxaha hubeysan ee isticmaala kana ganacsada daroogada, kuwaas oo uu sheegay inay amni xumo usoo kordhiyeen magaalada Garoowe.
Maxamuud Muuse Bile oo ka mid ah saraakiisha murtadiinta ee maamulka Puntland oo ka warbixinayay iska hor’imaad gudaha magaaladaasi ku dhexmaray maleeshiyaad taabacsan maamulkiisa iyo kuwa ka ganacsada waxyaabaha maanka dooriya ayaa sheegay in ciidamo ku labisan dareeska ciidanka oo ka ganacsada daroogada ay ku baaheen xaafadaha magaalada.
Qayla dhaantan kasoo yeertay saraakiisha maamulka ashahaada la dirirka ah ee Puntland ayaa kusoo beegantay xilli saacadihii lasoo dhaafay magaalada Garoowe ee xarunta gobolka Nugaal ay ka dhaceen iska hor’imaad hubeysan oo dhexmaray maleeshiyaad ka tirsan booliska maamulkaasi iyo kooxo hubeysan oo ka ganacsada daraagiska uuna faraha kasii baxayo amniga magaalo madaxda maamulkaasi ee Garoowe.
About The Author
