Wararka ka imaanaya waddanka Itoobiya ayaa sheegaya in xasuuq, barakicin iyo bililiqo ba’an uu ka socdo gobolka Tigray ee dhaca waqooyiga waddanka Itoobiya, xilli dhowaan heshiis labo geesood ah uu mucaaradka iyo dowladda dhexe ku dhex maray dalka Koonfur Africa.
Wakaaladda wararka ee Reuters oo soo xiganayso ilo wareedyo dhanka ammaanka ayaa sheegtay, in maleeshiyaadka Axmaarada ee taabacsan dowladda Itoobiya iyo kuwa Elatariya ay xasuuq ba’an ka gaysteen gobolka waqooyiga dhaca ee Tigray, oo ah gobol ay ku loolamayaan mucaaradka iyo xukuumadda xabashida.
Inkastoo uu dhowaan dhacay heshiis aan caga buuran ku taagnayn oo dhex maray TPLF iyo xukuumadda Abiy Axmed, haddana ciidamada ku xiran dowladda dhexe ee Addis Ababa waxay billaabeen tallaabooyin ka dhana heshiiska oo begsanaya dadka Tigray-ga, sida laga soo wariyay magaalooyin badan oo dhaca gobolkan.
Reuters oo soo xiganayso ilo wareedyo dad goobjoogeyaal ah oo ku sugan gobolka furinta ah ee dhaca waqooyiga wadanka ayaa sheegtay in ciidamada isku dhafka ah ee Axmaarada iyo Elatariya ay barakiciyeen kumannaan Tigray ah, halka ay xasuuq iyo bililiqo isugu dareen dad badan oo kasoo jeeda qowmiyadan oo dagaal xooggan oo qaatay muddo 2 sanno ah la gashay dowladda xabashida.
Kumannaanka Tigary-ga ah ee laga barakiciyay hoygooda iyo kuwa la toogtay ayay wakaaladdu sheegtay inay wakhtigaasi ku sugnaayeen gobolka Tigray xilli gobolkan ay wali joogaan ciidamada dowladda Elatariya iyo kuwa Axmaarada.
Jabhadda hubeysan ee Tigray ayaa horay uga digtay xadgudubyada ay ku kacayaan ciidamada dowladda Elatariya xilli ay ka hadlaysay xabad joojintii ay dhinacyadu ku kala saxeexdeen dalka Koonfur Africa, Heshiiskaas oo aan caga buuran ku taagnayn ayaana imika u muuqda mid sii burburaya.
About The Author
