Shil aad u xooggan ayaa laga soo tabiyay waddanka Nepal oo ka mid ah dalalka dhaca qaaradda Aasiya, ka dib markii ay burburtay diyaarad Rakaab ah oo ay la socdeen toddobaatameeyo qof oo dalxiiseyaal ah.
Afhayeen u hadlay shirkadda diyaaradaha ee Yeti ayaa sheegay in diyaaradda oo ay saarnaayeen 72 qof oo isugu jira dad rakkaab ah iyo shaqaalaha diyaaradda ay kula burburtay magaalada qadiimiga ah ee Pokhara, iyadoo kasoo kicitantay caasimadda waddankaasi ee Kathmanduu.
Sudarshan Partola oo ah afhayeenka diyaaradaha Yeti ayaa AFP u xaqiijiyay inaysan jirin cid ka badbaaday shilkan taas oo ka dhigan in dhammaan rakaabka iyo dadka shaqaalaha ah ay ku dhamaadeen shilkan diyaaradeed.
Dadka shilkan ku dhintay oo inta la hubo tiradooda lagu sheegay 72 ayay Mooskow sheegtay inay kaga jireen muwaadiniin u dhashay Ruushka, kuwaas oo ka mid ahaa dadkii rakkaabka ee ay diyaaraddu la burburtay.
Safaaradda Ruushka ayaa xaqiijisay in rakkaabka diyaaradda ay ka mid ahaayeen 4 muwaadin oo Ruushiyaan ah, halka aan si rasmi ah loo shaacin dadka kale iyo halka ay kasoo kala jeedaan.
Dowladda Nepal ayaa sheegtay in 15 qof oo ajnabi ah ay ka mid ahaayeen rakaabkii diyaaradda ku burburtay meel u dhow magaalada Pokhara ee dhacda bartamaha dalkaas subaxnimadii hore ee Axadda maanta.
About The Author
