Magaalada Laas-caanood waxaa markale saaka dib uga qarxay dagaal xooggan oo u dhaxeeya maleeshiyaad hubeysan oo taabacsan deegaanka iyo kuwa maamulka ashahada la dirirka ah ee Somaliland, ka dib markii ay magaalada soo weerareen maleeshiyaadka Somaliland.
Ilo wareedyo kala duwan oo ku sugan Laas-caanood ayaa soo sheegay in hiirtii hore ee saaka ay magaaladasi ku waabariisatay rassaas xooggan oo ay is dhaafsanayeen labada maleeshiyo ee kala taabacsan Somaliland iyo kuwa deegaanka, dagaalka xooggiisa ayaana laga soo tabiyay dhanka bari ee magaalada Laas-caanood.
Muuqaallo lasoo galiyay baraha bulshada ayaa muujinayay rassaas xooggan oo ay dhinacyadu isu adeegsanayaan, dadka dhacdooyinkan soo tabinaya ayaana soo sheegay in dagaalka uu si gaar ah uga billowday halka loo yaqaan Ex Control ee dhacda bariga magaalada Laas-caanood.
Inkastoo ay weli xaaladdu tahay mid cakiran haddana waxay dagaalladan saaka dib uga qarxay magaalada Las-caanood kusoo beegmayaan xilli maanta lagu waday in lasoo gabagabeeyo shir magaaladaasi uga socday odayaasha gobolka Sol, dadka deegaanka ayaana sheegay in warmurtiyeed ka dhan ah maamulka Somaliland oo lagu waday in laga soo saaro shirkaasi uu maamulka Somaliland ku dhaliyay inay weerareen magaalada Laas-caanood.
About The Author
