Magaalada Laascaanood ee xarunta gobolka Sool waxaa markale ka qarxay dagaalka u dhaxeeya dadka deegaanka iyo maleeshiyaadka maamulka ashahaada la dirirka ah ee Somaliland, iyadoo dagaalkii maantana la isku adeegsaday hubka noocyadiisa kala duwan.
Dagaalka ayaa billowday ka gadaal markii sida la sheegay ciidamo ku hubeysan hubka noocyadiisa kala duwan oo ka tirsan maamulka Riddada ah ee Somaliland ay dhowr jiho kasoo weerareen magaalada Laascaanood, jihada bari ee magaalada ayaana dagaallo adag lagula galo maleeshiyaadka maamulka Muuse Biixi.
Khasaare baaxad leh ayaa ka dhashay dagaalladii maanta ka dhacay magaalada Laascaanood, kuwaas oo soo gaaray illaa gelinkii dambe ee maanta waxaana jira warar sheegaya in dhinacyadu maxaabiis kala qabsadeen.
Dadka deegaanka ayaa shaaciyay sawirrada gaadiid ay sheegeen inay ku qabsadeen dagaalladii maanta ka dhacay magaalada, dagaalladii maanta ayaana u muuqday mid lagu jabiyay maamulka ashahaada la dirirka ah ee Somaliland.
Dhinaca kale duqaymo aad u xooggan ayaa barbar socday dagaalladii maanta ka dhacay magaalada, kuwaas oo lagu garaacay xaafadaha kala duwan ee Laascaanood, duqaymahan ayaana lagu eedeeyay inay gaysteen maleeshiyaadka maamulka uu fadhigiisu yahay Hargaysa, sawirro lagu faafiyay baraha bulshada ayaa muujinayay burburka xooggan oo ka dhashay duqaymaha lagu garaacay xaafadaha magaalada.
About The Author
