Inta la xaqiijiyay laba askari oo Maraykan ah ayaa ku dhaawacmay, weerar sawaariikh ah oo maanta lagu garaacay saldhigga ciidamada Maraykanka ee Caynu Asad ee kuyaal gobolka Anbaar ee galbeedka dalka Ciraaq, halkaas oo ay badi beegsadaan kooxo shiico ah oo ku xiran dowladda Iiraan.
Saraakiil ka tirsan ciidamada Maraykanka ayaa sheegay in kooxaha kasoo horjeeda ay tobanaan gantaal maanta oo Sabti ah ku garaaceen saldhigga ciidamada cirka ee Caynu Asad, halkaas oo ay deggan yihiin ciidamada Maraykanka.
Wakaaladda wararka ee Reuters oo soo xiganaysa sarkaal Ameerikaan ah ayaa sheegtay in sawaariikha oo ah nooca kuwa ballistic-ga ah lagu garaacay saldhigga Caynul Asad, sarkaalkaasi ayaana xusay in laba xubnood oo Maraykan ah ay dhaawacyo kasoo gaareen weerarkaasi.
Sarkaalka Maraykanka ah ayaa sidoo kale sheegay inay jiraan xubno ka tirsan ciidamada dowladda dabadhilfka ah ee Ciraaq, kuwaas oo si xun ugu dhaawacmay weerarka lagu beegsaday, warbaahinta maxalliga ee Ciraaq ayaa sheegtay in 40 gantaal lagu soo riday saldhigga Caynul Asad.
Ilo wareedyo kale ayaa soo sheegaya in ciidamada isbahaysiga uu hoggaaminaayo Maraykanka ay weerarkaasi kaga jawaab celiyeen18 gantaal, kuwaas oo ay ku dhufteen halka laga soo weeraray.
About The Author
