Ciidamada maamulka Yahuudda ayaa fuliyay weerar culus oo lagu dilay saraakiil sar sare oo ka tirsan dowladda Iiraan, waxayna markii ugu horraysay Iiraan qirtay in 7 sarkaal looga dilay weerarka ka dhacay Suuriya.
Taliska ilaalada Kacaanka Iiraan ayaa shaaciyay in weerarkii ciidanka Yahuudda ay ay ka gaysteen dhismaha qunsuliyada ay ku leeyihiin magaalada Dimishiq, ee caasimadda u ah Suuriya, looga dilay labo taliye oo ka tirsan ilaalada kacaanka iyo 5 kale oo la taliyeyaal militari ah.
Ilaalada Kacaanku waxay sidoo kale sheegeen in saraakiisha weerarkaasi ay ku waayeen uu ka mid yahay sarreeye Guuto Mohammad Rida Zahidi, oo ka mid ahaa taliyayaasha ciidamada ay ugu magac dartay Quds, iyo kaaliyihiisa, Sarreeye Guuto Muxammad Hadi Xaaji Raxiimi.
Ilo wareedyo laga soo xigtay taliska cidianka Iiraan ayaa sidoo kale xaqiijiyay in 5 kale oo la taliyeyaal ciidan u ahaa Ilaalada Kacaanka lagu dilay weerarka, waxayna kala ahaayeen Xuseen Amaan Allahyi, Mahdi Jalalaati, Shahid Sadaqaat, Cali Babai, iyo Cali Rozbahani.
Talefishinka rasmiga ah ee ku hadla afka Iran ayaa dhankiisa sheegay in dhowr dublamaasiyiin Iiraaniyiin ah lagu dilay weerarka ciidamada Yahuuddu ka fuliyeen qunsuliyadda ay ku leeyihiin Dimishqa.
Wakaalladda wararka ee Faransiiska ayaa dhankeeda sheegtay in tirada dadka ku dhintay weerarka Yahuudda ay gaarayso 11 xubnood oo ay ku jiraan 8 Iiraaniyiin ah, laba Suuriyaan ah, iyo hal xubin oo Lubnaani ah, tirakoobkaan ayaa muujinaya in dhamaan xubnaha la dilay ay ahaayeen ciidan millatari.
Weerarkan khasaaraha culus lagu gaarsiiyay dowladda Iiraan iyo saaxiibadeeda ayaa beegsaday dhismaha qunsuliyadda Iiraan ee kutaal xaafadda Al-mezzah ee caasimadda Dimishiq, Tehran ayaana ku hanjabtay inay bixin doonto jawaab celin deg deg ah oo ku habboon.
About The Author
