Colaadda soo cosboonaatay ee u dhaxaysa qowmiyadaha kala duwan ee ku dhaqan waddanka Itoobiya, ayaa gaartay soohdinta u dhaxeeya ismaamullada Tigreegga iyo Cafarta, halkaas oo laga soo tabiyay dhacdo weerar ah oo lagu dilay ku dhawaad 10 xubnood.
Kooxo hubeysan oo aan haybtooda la aqoonsan, ayaa lasoo wariyay in ilaa 7 qof oo rayid ah oo uu ku jiro ilmo 7 sano jir ah ku dileen weerar xilli saqbar ah ka gaysteen degmada Raya Casebo, oo ku taal xuduudka u dhaxeeya gobollada Canfarta iyo Tigreega.
Warbaahinta maxalliga Itoobiya oo soo xiganaysa Tezera Getahun, oo ah madaxa degmada Raya Azebo ee gobolka Tigray, ayaa sheegay in kooxda weerarka geysatay loo malaynayo inay ka soo jeedaan gobolka Canfarta.
“Dambiilayaashu waxay dileen dad arijirro rayid ah, oo uu ku jiro ilmo 11 sano jir ah, iyagoo hurda xilli saq-bar ah,” waxaa sidaas uu wargaysku kasoo xigtay madaxa degmada Raya Casebo.
Weerarka ka dhacay degmadaasi kadib, maamulka ku meel gaarka ah ee gobolka Tigreega ayaa bayaan rasmi ah oo uu ku faafiyay baraha bulshada dhankiisa ku xaqiijiyay in dadka weerarka gaystay ay kasoo jeedaan gobolka Canfarta ee ay jaarka yihiin.
“Maamulka ku meel gaarka ah ee Tigray wuxuu si dhow ula socdaa aqoonsiga dableyda, wuxuuna sii wadi doonaa xoojinta dadaalka lagu aqoonsanayo laguna soo qabanayo dambiilayaasha,” ayaa lagu yiri bayaanka kasoo baxa ismaamulka Tigray.
Maamulkan ayaa sidoo kale dadka kasoo jeeeda qowmiyaddaasi u xaqiijiyay in ay la socodsiin doonaan wixii kasoo kordha baaritaanka uu maamulku ku hayo dhacdadan, isagoo dhanka kale maamulka Canfarta iyo taliska booliiska federaalka ka codsaday in ay soo qabtaan ragga weerarka ka dambeeyay.
Dalka Itoobiya, waxaa si xowli ah uga socda beegsi isir sifeyn ah oo ay isku hayaan qowmiyadaha kala duwan ee dalkaasi ku dhaqan, toddobaadyadii lasoo dhaafay waxaa deegaannada soohdinta ah isku hayay qowmiyadaha Axmaarada iyo Tigreega, waxaana markan dagaalka dhankooda kasoo galay qowmiyada Cafarta.
About The Author
