Ugu yaraan labo xubnood oo qaxooti ah una dhashay Suudaan ayaa la xaqiijiyay in ay dhinteen halka 10 kalena dhaawacmeen, kaddib weerar ay kooxo hubeysan oo Itoobiyaan ah ku qaadeen xero kutaal deegaanka Awlala ee gobolka Axmaarada ee dalka Itoobiya.
Goobjooge ka mid ah dadka qaxootiga ah ee ka soo qaxay xerada Awlala oo qariyay magaciisa ayaa warbaahinta maxalliga ah ee Suudaan u sheegay in koox burcad ah oo hubaysan oo loo yaqaan tuugada gobolka ay weerar ku qaadeen qaxootiga ku sugan xeradaasi, kadibna ay rasaas xooggan ku fureen dadkii halkaas deegaanka ka dhiganayay ee ammaanka kasoo doonay.
Wuxuu sheegay inay halkaasi ku dileen qaxooti Suudaani ah, qof kale oo isagana ka mid ahaa dadkii goobta xerada ah degganaa ayuu sheegay in uu dhaawac culus soo gaaray kaasi oo keenay in uu mar dambe u geeriyoodo, 10 kale inay dhaawacmeen ayuu sheegay, kuwaas oo qaarkood xaaladdoodu liidato.
Inkastoo aan si rasmi ah loo sheegin maleeshiyada burcadda lagu sheegay ee dilka iyo dhaawaca u gaysatay qaxootiga kasoo jeeda Suudaan, haddana waxay barakacayaashu sheegayaan in gobolkan ay ka howlgalaan Fano.
Inka badan 6,000 oo Qaxooti Suudaani ah ayaa la sheegay in tan iyo billowgii bishii May ee lasoo dhaafay cabasho ka muujinayeen xaaladda ammaan ee xerada Awlala, waxayna dalbanayeen in la dejiyo meel nabdoon oo ka baxsan aaggan oo aan ka duwanayn magaalooyinkii ay colaadda kaga soo barakaceen.
About The Author
