Dowladda Ukraine ayaa maanta waxay qaaday mid ka mid ah weeraradii ugu waynaa ee ay adeegsatay diyaaradaha aan duuliyaha lahayn ee loo yaqaan Drone-ka, kuwaas oo ay ku beegsatay caasimadda Ruushka ee Moscow.
Weerarka oo ahaa mid aad u ballaaran ayaa waxaa ka hadlay duqa magaalada Moscow ee dowladda Ruushka, Sergei Sobyanin, kaasi oo sheegay in difaaca cirka uu soo riday 11 ka mid ah diyaaradihii Ukraine kusoo weerartay caasimadda.
“Tani waa mid ka mid ah isku dayadii ugu weynaa ee abid la sameeyo. ahna weerar loo adeegsado diyaarado aan duuliye lahayn oo lagu soo qaado Moscow”, waxaa sidaas yiri duqa caasimadda Ruushka.
Isagoo hadalkiisa sii wata ayuu masuulkan Ruushiyaanka ah sheegay in qaar ka mid ah diyaaradaha aan duuliyaha lahayn ee weerarka qaaday ay ku burburiyeen Podolsk oo ah magaalo 38 KM dhanka koonfureed kaga beegan aqalka looga arrimiyo dowladda Ruushka ee Kremlin-ka.
Warbaahinta Ruushka wararka u faafisa waxay sheegtay in weerarkan ka yimid dhanka dowlada Ukraine uu hakad kooban geliyay howlihii shaqo ee ka socotay garoomada diyaaradaha ee Moscow,wallow garoomadaas oo ka kooban saddex ay shaqadooda si caadi ah dib ugu soo celiyeen.
Dhanka kale, dowladda Ukraine ayaa shaacisay in ciidamadeeda cirka ay dhulka soo dhigeen 50 ka mid ah 69 diyaaradood oo ah nooca kuwa aan duuliyaha lahayn oo Ruushku leeyahay, kuwaas oo uu usoo hubeeyay weerar ay ka fuliyaan gudaha Ukraine.
About The Author
