Ciidamada booliska ee dowladda Tanzaaniya ayaa xabsiga dhigay ugu yaraan 14 xubnood oo ay ku jiraan hoggaamiyeyaasha mucaaradka ee dalkaasi, kuwaasi oo waday abaabulka mudaaharaadyo waawayn oo ka dhan ah xukuumadda.
Xisbiga mucaaradka ah ee CHADEMA ayaa war uu soo saaray ku sheegay in la xiray hoggaamiyaha xisbigaasi, Freeman Mbowe iyo ku xigeenkiisa Tundu lissu iyo xubno kale oo taabacsan mucaaradka, hoggaamiyaha mucaaradka ayuu xisbigu sheegay in laga qabtay waddo kutaal magaalada Daaru-salaam ee caasimadda Tanzania halka ku xigeenkiisana loogu dhacay gurigiisa.
Xisbigan mucaaradka ayaa wacad ku maray inay sii wadi doonaan isku soo baxyada ka dhanka ah dowladda ee looga soo horjeedo dilalka iyo afduubyada ay gaysanayaan ciidamada ammaanka ee dowladdaasi.
Ilo wareedyo kale ayaa soo sheegay in ciidamo badan lasoo dhoobay waddooyinka, kuwaas oo loo abaabulay joojinta isku soo baxyada ka dhanka ah dowladda, sidoo kalena xirayay dadka mudaaharaadyada sameynayay, dowladda Tanzania ayaa sidoo kale xirtay saddex saxaafi oo tabinayay dibadbaxyada ka dhanka ah dowladdaasi.
About The Author
