Dagaallo xoogan oo lafa jabis ah ayaa ka socda magaalooyin dhowr ah oo ka tirsan ismaamulka Axmaarada ee dhaca waqooyiga Itoobiya, halkaasi oo ay isku hayaan maleeshiyaadka jabhadda mucaaradka hubeysan ee Fano iyo ciidanka millatariga federaaliga ah ee dowladda Itoobiya.
Dagaallada ayaa lasoo warinayaa inay ka socdaan hareeraha dhowr magaalo oo ka tirsan ismaamulka Amhara, waxaana goobaha la isku fara saaray ka mid ah Gonder, Bahir Dar iyo deegaanno kale.
Jabhadda Fano ayaa guulo ka sheegatay dagaallada ka dhacay magaalooyinka qaar, sida dagaallada Khamiistii lasoo dhaafay ka billowday Bahir Dar, waxayna sheegeen in maalintaasi maleeshiyadoodu u suuragashay inay qaybo ka mid ah magaaladaasi gacanta ku dhigaan, sida xarunta Teleefishanka.
Magaalada Bahir Dar oo ah xarunta ismaamulka Axmaarada ayaa lasoo warinayaa inay ku jirto xaalad hubanti la’aan ah, waxaa go’an Isgaarsiinta magaalada, waana mid ka mid ah magaalooyinka si wayn ugu loollamayaan dhinacyada is haya.
Dagaallada tooska ah ee u dhaxeeya labada dhinac waxaa barbar socda duqaymo bahalnimo ah oo ay fulinayaan ciidamada cirka ee xukuumada Addis-ababa, kuwaas oo qaar lasoo wariyay inay ku dhinteen dad rayid Axmaaro ah.
Muuqaallo lasoo geliyay baraha bulshada gaar ahaan X ayaa muujinayay askar ka tirsan millatariga Itoobiya oo xasuuqyo daran kula kacaya dadka Axmaarada ah ee aan hubeysnayn, waxaa sidoo kale baraha bulshada harqiyay muuqaallada ciidanka Abiy Axmed oo gowrac gaysanaya, sidoo kalena tacdiibinaya dadka Axmaarada ah.
About The Author
