Wararka ka imaanaya wadanka Suuriya ayaa sheegaya in kooxaha mucaaradka ah ay weli sii wadaan guluf dagaaleedka ay ku hayaan nidaamka Nuseyriga ah ee uu hoggaamiyo Bishaar Al-asad.
Kadib dagaallo saacado badan qaatay ayay xoogag hubaysan ugu suurtagashay in ay lawareegaan inta badan gobollada dhaca Koonfurta Suuriya.
Xalay fiidkii ayay mucaaradku qabsadeen magaalada Darca ee dhacda Koonfurta wadankaas waxayna magaaladan ka mid aheyd meelihii ugu horraysay oo ay ka billaawdeen kacdoonnada sanaddii 2011.
Goobjoogayaal ayaa sheegay in xoogaga mucaaradku ay gacanta ku dhigeen dhammaan xarumaha maamulka sida qasriga madaxtooyada gobolka,saldhigga booliska,garoonka melleteriga iyo saldhigyadii ciidamada Nuseyriga ay ku sugnaayeen.
Sidoo kale maanta barqadii ayay mucaaradku qabsadeen magaalada Asuweydaa oo ah caasimadda gobolka isla magacan wata, goob joogayaal ayaa sheegay in ciidamada nidaamka Nuseriga ay ufirxadeen dhanka magaalada Dimishiq.
lawareeggidda labadan gobol ayaa ka dhigan in ciidamada nidaamka bishaar Al-asad ay ku hareen oo kaliya gobolka Alquneydarah ee kaabiga ku haya xuduud beenaadka ay wadaagaan Suuriya iyo dhulka Falasdiin ee gummeysiga Yahuudda ku jira marka laga hadlayo gobollada koonfureed.
Khamiistii lasoo dhaafay ayay aheyd markii ay mucaaradku dagaal culus kadib lawareegeen magaalada muhiimka ah ee Xammaah.
About The Author
