Khasaare laxaad leh oo isugu jira dhimasho iyo dhaawac, ayaa ka dhashay dhul-gariir xooggan oo Talaadadii maanta ku dhuftay deegaanno dhaca koonfur-galbeed dalka Shiinaha.
Inta la hubiyay ugu yaraan 95 qof ayaa ku dhintay dhulgariirkan xooggan oo si gaar ah looga soo calaamadiyay gobolka Tibet ee dhaca buuraha Himalaya ee koonfur-galbeed waddanka Shiinaha.
Ilo wareedyo dhanka deegaanka ah ayaa soo sheegay in dhulgariirka si wayn looga dareemay dalka Shiinaha deriska la ah ee Nepal, waxaa dhulgariirkaan ku dumay dhismayaal dhowr ah.
Wakaalladda Wararka u faafisa Shiinaha oo xiganaysa mas’uuliyiin maxali ah, ayaa xaqiijisay in in ka badan 130 xubnood ay ku dhaawacmeen dhacdadan, waxay sidoo kale sheegtay in khasaaraha dhimasho iyo midka dhaawaca ah uu mar walba kordhi karo, maadaama dhismeyaal badan burbureen.
Warbixin ay soo saartay xarunta shabakadaha dhulgariirka ee Shiinaha ayaa lagu sheegay in dhulgariir lagu qiyaasay 6.8 Richter, uu ku dhuftey Shigatse oo ah magaalada labaad ee ugu weyn gobolka Tibet iyo nawaaxigeeda, halka hay’adda sahaminta dhulka ee Maraykankana ay sheegtay in dhulgariir lagu qiyaasay 7.1 uu ka dhacay gobolka Tibet ee waddanka Shiinaha.
Dhinaca kale, warbaahinta Hindiya ayaa soo sheegtay in dhul-gariirkan ay dareemeen dadka ku dhaqan caasimadda Nepal ee Katmandu, waxay intaas ku dareen wararku in dadkii ku noolaa caasimada ay ka carareen guryahoodii kaddib markii inbadan oo iyaga ka mid ah ay la kulmeen gariir xooggan.
Aagagga koonfur-galbeed ee dalka Shiinaha ayaa ah halka inta badan ka dhacaan dhulgariirada, sannaddu markii ay ahayd 2008-dii, dhulgariir xooggan oo ka dhacay gobolka Sichuan ayaa waxaa ku dhintay ilaa 70,000 oo qof.
About The Author
