Burcadda hubeysan ee dilalka iyo boobka hantiyeed ka gaysta dalka Koonfur Afrikaanka ah ayaa sare u qaaday beegsiga gaarka ah ee ay ku hayso dadka Soomaaliyeed, iyaga oo dilal bareer ah u gaystay nin ganacsade ah iyo hooyo Soomaaliyeed.
Saacadihii lasoo dhaafay waxay burcadda hubeysan toogasho ku dileen mid ka mid ah ganacsatada Soomaaliyeed, kaasi oo lagu magacaabi jiray C/llaahi Cilmi Cawaale.
Dilkaan ayaa si gaar ah kaga dhacay xaafad ka tirsan Philippi oo ka mid ah degmooyinka hoostagta magaalada Keebtown, waxaana ninkaasi halkaas ku beegsaday kooxo hubeysan oo burcad ah.
Wararku waxay sheegayaan in dilka uu dhacay xilli uu Cabdullaahi Cilmi kusii jeeday goobtiisa shaqo, sida ay soo xaqiijiyeen ilo wareedyo Soomaali ah.
Ilo wareedyadu waxay intaas ku dareen in dilka kadib ay goobta soo gaareen ciidamo ka tirsan kuwa booliska, kuwaas oo sameeyay baaritaano aysan wax natiijo ah kasoo bixin sidaba looga bartay.
Muuqaal lagu faafiyay baraha bulshada ayaa muujinayay ciidamo Booliis ah oo isa soo tubay goobta uu dilku ka dhacay, waxaa dhow jeer isla ciidankan lagu eedeeyay inay ku lug leeyihiin dilalka iyo dhaca loo gaysto ganacsatada Soomaaliyeed ee dalkaasi.
Waxay dhacdadani kusoo beegantay xilli laba maalmood ka hor sidan oo kale kooxo burcad ah ay dhaawac daran u gaysteen hooyo Soomaaliyeed oo lagu magacaabi jiray Saado, taasi oo la weeraray xilli ay ku sugnayd tuulo lagu magacaabo Grabouw oo dhowr kiiloo-mitir u jirta magaalada Cape Town ee dalka Koonfur Afrika.
Saado ayaa la lasoo wariyay in dhaawaca loo dhigay cisbitaal, wallow markii dambe ay dhaawacaasi u geeriyootay, kooxda burcadda ah ee dilka gaysatay ayaa ka baxsatay goobta, waxayna ku dhex toogteen gaari ay wadatay.
About The Author
