Wararka ka imaanaya waddanka Koonfur Africa, ayaa sheegaya in saacadihii lasoo dhaafay kooxo hubeysan oo Koonfur Afrikaan ah ay toogasho ku dileen laba xubnood oo ka mid ah dadka ganacsiyada ku leh dalkaasi.
Weerarka ayaa si gaara u bartilmaameedsaday goob ganacsi oo Soomaalidu ku leeyihiin Xaafad lagu magacaabo kraaifontein ee kutaal duleedka waqooyi ee magaalada Cape town ee waddanka South Africa.
Kooxda burcadda ah ee weerarka gaysatay oo ku hubeysnaa qoryo ayaa mar qura waxay rassaas oodda uga qaadeen laba qof oo ganacsato Soomaaliyeed ah, kuwaas oo ku sugnaa dukaanka ganacsi ee la weeraray.
Muuqaal ay duubtay CCTV Camero ayaa muujinayay kooxda oo si toos ah rassaas nool nool ugu beegsanaya dhalinyaradan Soomaaliyeed, ilo wareedyo ayaa xaqiijiyay in mid ka mid ah ganacsatada Soomaaliyeed uu isla goobta ku geeriyooday.
Waxay sidoo ilo wareedyadu intaas ku dareen in qofka labaad oo isagana uu soo gaaray dhaawac culus la geeyay cisbitaal kuyaal magaalada Cape Town ee dhacdadu ka dhacday, halkaas oo lasoo wariyay in uu ugu dambayn ku naf-waayay.
Weerarka markii uu dhacay kadib, waxaa lasoo wariyay inay goobta gaareen ciidamo booliis ah, kuwaas oo goobta ka sameeyay baaritaanno sida caadada u ah aysan wax natiijo ah kasoo bixin.
Muuqaalka cameradda qarsoon duubtay ayaa si wayn u qabsaday baraha bulshada, wuxuuna muuqaalku muujinayay dhibaatada ay la noolyihiin dadka Soomaaliyeed ee ku sugan waddanka Koonfur Africa.
Mid ka mid ah dadka Soomaaliyeed ee ku dhaqan dalkaasi oo warbaahinta gudaha la hadlayay ayaa sheegay in dhibaatooyin joogta ah oo dilal u badan kala kulmaan kooxo burcad ah oo u dhashay dalka koonfur Africa iyo kuwa gaangis ah.
About The Author
