Darawallada gaadiidka ee ka howlgala gobollada dhexe ee Soomaaliya, ayaa cabasho xooggan ka muujinaya isbaarooyin xad-dhaaf ah oo waddooyinka uu soo dhigtay maamul goboleedka ashahaada la dirirka ah ee Hirshabeelle.
Gaadiidleyda oo warbaahinta kula hadlayay Muqdisho ayaa sheegay in lagu soo rogay lacago boqollaal dollar ah, taasi oo aysan awoodin, waxay si gaar ah dhaca dadweynaha ugu eedeeyeen Cali Guudlaawe iyo maamulkiisa.
Waxay sheegeen in madaxda maamulkaasi Riddada ah ay iska dhaga-tireen baaqyo ay u direen, marba marka ka dambeysana lasii kordhinayay lacagaha baadda ah ee ay ka qaadaan gaadiidleyda isaga goosha caasimada Muqdisho iyo gobollada dhexe ee Soomaaliya.
Gaadiidka qaar ayay sheegeen in lagu soo rogay lacag baad ah oo dhan 700 oo Dollar, maamulka Ridada ee uu madaxa u yahay murtad Guudlaawe ayay sheegeen in uu caqabad ku noqday shaqadooda.
Shirka jaraa’id ee ay Muqdisho ku qabteen ayay gaadiidleydu ku sheegeen in tan iyo Sabtidii ay gaadiidkooda ku xayiran yihiin Muqdisho, shaqoo joojinta ay sameeyeen ayay intaas ku darreen inay sii socon doonto.
Qaar ka mid ah gaadiidledu waxay tilmaameen in lacagaha baadda ah ay usii dheertahay dhac baahsan oo loo gaysto gaadiidka iyo sidoo kale dilal lagula kaco dadka rayidka ah ee isticmaala gobolka Sh/dhexe.
Dhowaan ayay ahayd markii murtad Guudlaawe madaxa maamulka Riddada ah ee Hirshabeelle uu isbaaro ku eedeynayay murtad Xaadoole oo ka mid ah xubnaha golaha dawaaqiidda, waxayna saraakiisha iyo madaxda Riddadu ka simanyihiin baadda gaadiidleyda iyo dadka socotada ah.
Cabashadan ka timid gaadiidleyda isaga kala goosha gobolka Banaadir iyo gobollada dhexe ee Soomaaliya ayaa kusoo beegmaya xilli maalin ka hor 7 baabuur oo kasoo amba-baxay magaalada Muqdisho kuna jeeday magaalada Gaalkacyo lagu afduubtay gobolka Sh/dhexe.
Gaadiidka oo ay saarnaayeen 130 qof ayay maleeshiyo Riddada ka tirsan ku afduubteen inta u dhaxeysa deggaannada Wargaadhi iyo Cadcaddeey sida uu xaqiijiyay nin u hadlay gaadiidleyda, waxayna qayb ka tahay dhibaatooyinka ay sida joogtada ah ula kulmaan dadka rayidka ah ee ku safra deegaannada uu cadowgu kaga sugan yahay Sh/dhexe.
About The Author
