Xujayda martida Baytka Allaah ayaa saaka oo Arbaco waxay u jiheysteen macsharka Mina oo kuyaal inta u dhaxayso magaalada barakaysan ee Maka iyo macsharka Musdalifah, inka badan Hal miyan iyo 800 kun oo Xujay ah ayaana sannadkan gudanaya acmaasha Xajka, kuwaas oo isugu jira xujaajta dhulka barakaysan iyo dalalka kale ee caalamka.
Mashcarka Mina waxay martida baytka Allaah maanta ku gudan doonaan _Yowmu Tarwiyah_ oo ah manaasikta ugu horreeya ee acmaasha xajka, taasi oo socon doonta muddo 6 maalmood ah, iyagoo ku dayanaya Nabiga Sallallaahu caleyhi Wasallama.
Waxay martida Baytka Allaah halkaas ku dukan doonaan salaadaha Duhur, Casir, Maghrib, Cisha iyo Fajarka, wayna soo gaabin doonaan salaadaha iyaga oo aan jamcinaynin, halkaas ayay ku hoyan doonaan xujaydu, ka hor inta aysan u bixin Sagaalaadka ama maalinta si ay u istagaan Banka Carafa, oo kuyaal meel 12 KM u jirta magaalada Maka, si ay halkaas ugu gutaan acmaasha ugu wayn ee xajka.
Waxaa macsharkan maanta ku kulmaya xujay kala midab, kala af iyo kala qaarado ah, waxaanay halkaasi ku gudan doonaan acmaasha xaajiga laga rabo maalinta 8-aad ee Dul-xij, waxayna xujaajtu aad u badinayaan Ducada, waxa kaliya ee kulmiyay ayaana ah kalimada Towxiidka.
Maalinta berri oo ah Khamiis (sagaalaadka) waxay Xujeydu gudan doonaan Rukniga ugu weyn ee acmaasha Xajka oo ah istaaga Banka Carafah, Nabi Muxammad Sallallaahu Caleyhi Wasallama ayaa yiri “Xajku waa carrafo” taasi oo ay culimadu ku fasireen in acmaasha ugu weyn ee Xajka ay dhacayaan maalinta barri ee Carafo, waxay na shareecada Islaamku u jidaysay muslimiinta kale ee aan haleelin inay Xajiyaan iney Soomaan maalinta Carafo oo ah Khamiista barri, Soonkaasi oo ah mid fadli wayn xamabaarsan.
About The Author
