Dhowrkii sano ee u dambeeyey heerarka dembiyada kala duwan oo ay ka mid yihiin dilka, dhaca iyo afduubka ayaa si weyn ugu ku sii kordhaya magaalooyin badan oo ay ku jirto Mekelle oo ah caasimadda gobolka Tigray ee waqooyiga dalka Itoobiya, sida ay shaacisay idaacadda Deutsche Welle (Dayj-shifeella) oo laga leeyahay dalka Jarmalka.
Waxaa la sheegay in fal-dambiyeedyadani ay yihiin kuwo ka dhashay xaaladda colaaddii dhiigga badan ku daatay ee gobolkaasi ka qaraxday 2020-kii. Waxaanay wararku sheegayaan in xattaa caruurta yar yar la afduubanayo iyadoo madax-furasho laga raadinayo.
Wiil yar oo todoba sano jir ah ayaa lagu soo warramayaa in dhawaan lagu afduubtay gobolkaasi, kadibna la khaarajiyey, iyadoo weliba hooyadii wiilkaasi dhashay ay bixisay qayb ka mid ah lacagtii madax-furashada ahayd ee laga dalbaday, sida idaacad laga leeyahay dalka Ingiriisku ay baahisay.
Marka laga soo tago afduubka mararka qaar sababa dilalka foosha xun, dembiyada la xiriira kufsiga iyo dhaca ayaa iyaguna caadi ka noqday gobolka Tigrey dhowrkii sano ee la soo dhaafay, Iyadoo haatanna wadnaha farta lagu hayo lagana cabsi qabo dagaallo hor leh oo dib uga qarxa gobolkaasi, maadaama xilligan ay si weyn isku hubaynayaan kooxaha mucaaradka ee TPLF.
Geesta kale dil-wadareedyada iyo afduubka ayaa noqday mid ka mid ah astaamaha ugu waaweyn ee maamulka Ra’iisul Wasaare Abiy Ahmed, waxaanay falalkan noocan oo kale ahi ay sidoo kale joogto uga dhacaan gobollada kale ee Oromada iyo Amxaarada.
About The Author
