Xiisadda colaadeed ee ka taagan degmada Boorama ee xarunta gobolka Awdal ee u dhaxaysa dadka deegaanka iyo maleeshiyada maamulka Riddada Somaliland, ayaa keentay in uu is casilo mid ka mid ah golaha wasiirada ee maamulka Cabdiraxmaan Cirro.
Shir jaraa’id oo uu warbaahinta u qabtay ayuu murtad Axmed Yaasiin oo ahaa wasiirka warfaafinta maamulka Riddada Somaliland ku shaaciyay in uu iska casilay xilkii uu hayay, sababo ku aaddan xasuuqa maleeshiyada maamulkaasi ka gaysteen degmada Boorama.
Ninkan ayaa sheegay in wixii Boorama ka dhacay uu sababteeda isku casilay, maadaama uu ahaa ninkii soo saaray go’aanka sida wayn ay uga caroodeen dadka reer Boorama ee keenay isku soo baxyada xasuuqa isku beddelay.
Wuxuu sheegay in uusan diyaar u ahayn in uu sii wado go’aamada kasoo baxaya xafiiskiisa ee lagu xasuuqayo shacabka reer Boorama, halka kuwa dadka lagu dejinayana uu warbaahinta lasoo hor istaago murtad Cirro oo ah madaxa maamulkaasi.
Dhanka kale, maleeshiyada maamulka Riddada Somaliland ayaa lagu eedeeyay in ay dhibaatooyin ka gaysteen xarumaha xaafimaadka ee magaalada Boorama, halkaas oo lagu hayay dhaawacyo aad u fara badan oo lagu dabiibayay.
Maleeshiyadan ayaa muuqaallo lagu faafiyay baraha bulshada kasoo muuqday iyaga oo dhaawacyada uga daba-tagay cisbitaallada, halkaas na rassaas kula dhacaya dadka shacabka ah ee ay bannaanka kusoo laayeen.
Mid ka mid ah dadka deegaanka ayaa sharaxaya dhibaatooyinka maleeshiyada maamulka Riddada Somaliland ka gaysteen xarumaha caafimaadka ee magaalada Boorama.
Xaaladda magaalada Boorama ayaa weli ah mid cakiran, shacabka ayaa weli ah kuwa careysan, inkastoo xaaladda aysan sidii hore ahayn, haddana lama oga waxa xigi doona maadaama ay taagan tahay xiisadda colaadeed ee ka jirta magaalada.
About The Author
