Waxaa sii xoogaysnaya oo dawladda Xabashida Itoobiya ay sii laba-jibaartay damaca badeed, xilli labada maamul ee Addis Ababa iyo Eretriya ay isku hub urursanayaan qarkana u saaran yihiin in mar kale uu ka dhex-qarxo dagaal uu dhiig badani ku daato.
Warbixin uu soo bandhigay maamulka Abiy Axmed iyo khubaro taageersan ayaa ku dooddaya in damaca badeed ee Itoobiya uu ku salaysan yahay taariikh iyo sharci caalamiya, isla markaana helitaanka badeed ee Itoobiya uu yahay mid lagama maarmaan ah.
Gaal Abiy Axmed oo warbixinta qayb ka ah ayaa sheegay in dalabka Itoobiya ee marin-badeedku uu leeyahay saldhig sharci, taariikh juquraafiyadeed iyo mid dhaqaale, waxaanu wacad ku maray in dedaallada la doonayo in lagu xaqiijiyo damacaasi ay sii socon doonaan.
Xeel-dheereyaal ka kala tirsan Machadka Daraasaadka Siyaasadda iyo Machadka Arrimaha Dibadda ee Itoobiya ayaa bulshadda dalkaasi ugu baaqay in ay taageeraan damaca badeed ee Itoobiya, oo ay sheegeen in dowladdoodu u aragto arrin qaran oo lama-huraan ah.
Dowladda Eretriya ayaa ka jawaabtay damaca Itoobiya ee sii ballaaranaya ee ay ku doonayso dekedo iyo marinno ay leedahay ka rukumato Badda Cas iyo gacanka Cadmeed.
Wasiirka warfaafinta Eretriya Yemani Gebremaskel oo warbixintan ka jawaabay ayaa mas’uuliyiinta Itoobiya ku tilmaamay kuwo u fikiraya sidii dad waalan oo kale. Isagoo xisbiga Barwaaqo ee uu hoggaamiyo Abiy Axmed ku eedeeyey in uu wado qorshe ka dhan ah Geeska Afrika.
Waxa uu sheegay, in Itoobiya ay beryahan dambe caadaysatay soo bandhigista taariikho ka fog xaqiiqada, oo been-abuur ah, iyo kuwo duugoobay oo wakhti-xaadirkan aan soconayn.
Gebrameskel waxuu ka sanqariyey in maamulka Abiy Axmed uu ku hawllan yahay ajande sun ah oo qas iyo qalalaase ka abuuri kara gobolka. Waxaanay si cad ugu gafayaan ayuu yiri deris-wanaagga, marka ay sheeganayaan bad iyo dekedo ay dalal kale leeyihiin.
Hanjabaadahan ayaa imanaya xilli labada dalba ay diyaar-garow iyo abaabul xooggan ku jiraan isla markaana ay ciidamo fara badan soo dhoobeen xuduudka ay wadaagaan. Iyadoo ciidamada labada dhinacba la sheegaya in dhufaysyo iyo gabbaadyo waaweyn ay ka samaysteen goobihii lagu daadiyey.
About The Author
