Wararka ka imaanaya dalka Iiraan ayaa sheegaya in laba qarax oo xooggan ay maanta siyaabo kala duwan uga dhaceen gobolka Hurmuzgaan ee koonfurta dalkaasi.
Qaraxyadan ayaa si gaar ah kaga dhacay magaalada dekedda leh ee Bandar Cabbaas, inkastoo ilaa hadda aaney jirin war rasmi ah oo xaqiijinaya in labada qarax ay xiriir leeyihiin.
Qaraxa koowaad ayaa ka dhacay dhisme guri oo ka kooban 8 dabaq, kaas oo ku yaalla gudaha magaalada Bandar Cabbaas.
Sida ay sheegtay wakaaladda wararka ee Fars, qaraxan wuxuu burburiyay laba dabaq, wuxuuna khasaare culus u geystay dabaqyada kale ee dhismaha la beegsaday.
Sidoo kale, in ka badan 10 gaari oo yaalay agagaarka goobta ayey soo gaareen waxyeello xoogan.
Qaraxa labaad wuxuu ka dhacay nawaaxiga dekedda Bandar Cabbaas, inkastoo aan faahfaahin buuxda laga bixin sababtiisa iyo khasaaraha ka dhashay.
Telefishinka rasmiga ah ee Iiraan ayaa baahiyay muuqaallo muujinaya wejiga hore ee dhismaha oo gebi ahaanba dumay, iyadoo burburka uu ku fiday waddooyinka ku dhow.
Dhanka kale, wakaaladda Tasnim oo soo xiganaysa maamulka gobolka Hormozgan ayaa xaqiijisay in ciidamada gurmadka degdegga ah, dab-demiska iyo caafimaadka ay si dhaqso ah u gaareen goobta, ayna bilaabeen hawlaha badbaadinta iyo sugidda ammaanka.
Ilaa hadda lama shaacin tirada rasmiga ah ee khasaaraha naf iyo maalba leh. Dhacdooyinkan ayaa kusoo beegmaya xilli ay warbaahinta Iiraan beenisay warar la xiriiray dil loo geystay taliye ciidan oo sare, inkasta oo aysan jirin caddeyn muujinaysa xiriir toos ah oo ka dhexeeya qaraxyada iyo arrintaasi.
Dhinaca kale.
Wakaalada wararka ee Mahr waxay sheegtay in qaraxa kale ee ka dhacay dekadda Bandar Cabaas uu sababay geerida gabar 4 sano jir ah, halka 14 qof ay ku dhaawacmeen.
Maamulka maaraynta masiibooyinka ee gobolka Hormozgan ayaa xaqiijiyay in sababta qaraxa weli baaritaan lagu wado, natiijooyinkana ay wakhtiyada soo aadan shaacin doonaan hay’adaha rasmiga ah.
Dhanka kale, Ilaalada Kacaanka Iiraan iyo ilo xog-ogaal ah oo la hadlay wakaaladda Tasnim ayaa si cad u beeniyay warar ku faafay baraha bulshada oo sheegaya in la dilay taliyaha ciidanka badda ee Ilaalada Kacaanka.
Warbaahinta rasmiga ah ayaa sidoo kale sheegtay in aysan jirin caddeyn muujinaysa xiriir ka dhexeeya qaraxyada ama in lagu beegsaday hoggaan ciidan.
Bandar Cabbaas waa deked istaraatiiji ah oo aad muhiim ugu ah dhaqaalaha Iiraan, taasoo ka dhigaysa dhacdo kasta oo amni si dhow loola socdo, iyadoo la sugayo natiijada baaritaannada rasmiga ah saacadaha ama maalmaha soo socda.
About The Author
