Mid ka mida warbaahinta Yahuudda oo sameeyey qiimeyn ka digaysa xiisad sii kordheysa oo u dhaxeysa Masar iyo Sahaayinada gudaha Geeska Afrika, taas oo sare u qaadaysa suurtagalnimada iska horimaad ciidan oo dadban ama toos ah oo ka dhaca Soomaaliya.
Natsiv Net oo warbaahinta warbixintan daabacday ayaa sheegtay in horumarrada socda ilaa Febraayo 2026 ay muujinayaan tartan sii xoogeysanaya oo u dhexeeya Qaahira iyo Telaabiib, gaar ahaan marka loo fiiriyo faragelintooda sii kordheysa ee Soomaaliya.
Sida lagu sheegay warbixinta, go’aanka Yahuuddu ay dal madax-bannaan ugu aqoonsatay maamulka Somaliland ayaa noqday isbeddel saamayn leh. Waxaanay warbixintu xustay in maamulka C/Fataax As-siisi uu tallaabadaas si adag uga hor-yimid.
Natsiv Net waxay carabowday in Qaahira ay u aragtay aqoonsigaas mid jebinaya madaxbannaanida Soomaaliya, isla markaana uu yahay isku-day ay Yahuuddu ku doonayso inay saldhig istiraatiiji ah kaga hesho Badda Cas iyo Gacanka Cadmeed.
Jawaab ahaan, warbixintu waxay ku andacooneysaa in Masar ay dedejinayso qorshe ay doonayso inay ciidamadeeda ugu dirto Soomaaliya. Waxaana qaar ka mid ah ay ku jiraan qaab-dhismeedka howlgalka Midowga Afrika, halka kuwo kalena ay ku aadayaan heshiis lala galay Muqdisho.
Waxay ahayd 11-kii Febraayo 2026, markii Masar ay qabatay dhoolatus ciidan oo ka dhacay Qaahira, kaas oo uu ka qeyb-galay Gurguurte oo ah madaxa Villa Soomaaliya, iyadoo warbixintu ku tilmaantay fariin ka hortag ama digniin ah oo loo dirayay Yahuudda iyo Itoobiya.
Dowladda uu hoggaamiya C/Fataax As-siise ee Masar, si rasmi ah ayay u diidday aqoonsiga Yahuudda ee Somaliland, iyadoo ku sifeysay mid halis ku ah amnigeeda qaran iyo danaha istiraatiijiga ah ee ay ku leedahay Badda Cas.
Saraakiisha Masar iyo kuwa Sahaayinadu midkoodna si fagaare ah uma aysan sheegin inay isku diyaarinayaan iska horimaad millateri, laakiin warbixintu waxay ka tarjumaysaa dareenka sii kordhaya ee gobolka ee ku aaddan saameynta Geeska Afrika.
About The Author
