Maamulka gumeystaha Yahuudda iyo dowladda Maraykanka ayaa maanta si wadajir ah u billaabay duullaan ballaaran oo ka dhan ah Iiraan, kuwaas oo si isku mid ah u wada beegsaday magaalooyin kuyaal Iiraan oo ay Tehran ugu horrayso.
Donald Trump, madaxweynaha Maraykanka, ayaa sheegay in ay billaabeen weerar ballaaran oo ka dhan ah dowladda Iiraan, halka maamulka Yahuudda ay wasaaraddeeda difaaca sheegtay inay weerar ka hortag ah ku qaadeen Iiraan.
Idaacadda ciidanka Yahuudda oo soo xiganaysa ilo wareeedyo ayaa sheegtay in duqaymihii ugu horreeyay ee ka dhacay Tehran qaarkood lagu beegsaday xubno sar sare, warbaahinta gumeystuhu waxay sidoo kale sheegtay in qaar ka mid ah duqaymuhu beegsadeen tobannaan bartilmaameed oo dowladeed ah.
Wararka qaar waxay sheegayaan in duqaymaha Tehran ka dhacay lagu dilay taliyeyaal ciidan iyo xubno sare sare oo dowladda ka tirsan, wallow Iiraan ay dhankeeda beenisay arintaasi, waxay na intaas ku dartay inay nabad qabaan saraakiisha ciidanka iyo masuuliyiinta dowladda oo ay ka mid yihiin taliyaha ciidanka iyo madaxweynaha xukuumadda shiicada.
Duqaymaha dowladda Maraykanka iyo maamulka Yahuudda waxay sidoo kale beegsadeen magaaloyin ay ka mid yihiin Zanjan oo dhacda waqooyi-galbeed ee Iran iyo Shiraz, jugta qaraxyo dhowr ah ayaa lasoo wariyay in laga maqlay magaalooyinkaasi.
Warbaahinta Axios oo soo xiganaysa mas’uuliyiin Yahuud ah, ayaa sheegtay in Cali Khumeyni oo ah hoggaamiyaha sare ee Iiraan iyo Mascuud Pezeshkian oo ah madaxweynaha dowladda shiicada ah ee Iiraan ay ka mid ahaayeen bartilmaameedyada duqeymaha Yahuudda ee Tehran ka dhacay.
Dhankeeda, Iiraan waxay qaadday weeraro jawaab celin ah oo is haysta min Falastiin oo gumeysiga Yahuudda ku hoos jirta ilaa dalalka Khaliijka oo ay ku beegsadeen masaalixda Maraykanka.
Ciidanka cirka ee Iiraan ayaa gantaallo nooca kuwa dheereeya ku duqeeyay magaalooyinka Yahuudda xoogga ku haystaan, waxayna taasi oo keentay in dadka sahaayinada ah ee xoogga lagu dajiyay dhulalka muslimiinta ay galaan godadka gabbaadka ah ee dhulka hoostiisa ka qodan.
Khasaare hantiyadeed iyo dhaawacyo ayaa ka dhashay weerarada jawaab celinta ah ee dowladda Iiraan ku qaaday magaalooyinka Yahuuddu xoogga ku haystaan. Waxay sidoo kale Iiraan weeraro is xig-xigay ku beegsatay saldhigyo ciidan oo Maraykanku ku leeyahay dalalka Khaliijka.
Gantaallada Iiraan ayaa lagu beegsaday saldhigyada Maraykanka ee kuyaal magaalooyinka Dooxa oo Qadar ah, Abuu Dubaay oo Imaaraadka Carabta ah, Baxrayn, Kuwayd iyo Riyaad oo Sucuudiga ah.
Imaaraadka Carabta war uu soo saaray wuxuu ku sheegay in weerarada ka yimid dhanka Iiraan ay beegsadeen Abuu Dubaay, khasaare kala duwan in ay ka dhasheen gantaalladaasi ayay sheegeen oo ay ka mid tahay dhimashada hal qof.
Iiraan waxay ku goodisay in weeraradu socon doonaan, dowladaha Khaliijka sida Imaaraadka Carabta iyo Qadar oo warsaxaafadeedyo soo saaray waxay sheegeen in lagu soo xadgudbay, kana jawaab celinayaan weerarada kaga yimid dhanka Iiraan.
About The Author
