Wararka ka imaanaya dalka Koonfur Africa, ayaa sheegaya in laba ganacsade oo kasoo jeeda Soomaaliya, saacadihii lasoo dhaafay lagu dilay qaybo ka mid ah dalkaasi.
Ilo wareedyo xog-ogaal ah oo ku sugan Koonfur Africa, ayaa sheegay in dilka koowaad iyo labaad ee loo gaystay ganacsatada ay dhaceen habeenkii xalay, mid ka mid ah ganacsatada ayaa lagu dilay dukaan uu ka shaqeeysanayay oo kuyaal xaafadda Kuyaza ee degmada Khayelitsha ee magalada Cape Town.
Ninkan oo lagu magacaabi jiray Cabdisamad Axmed Maxamuud, ayay kooxo burcad Koonfur Afrikaan ah ugu dhaceen goobtiisa ganacsi, halkaas ayayna ku dileen sida uu xaqiijiyay mid ka mid ah Soomaalida.
Ciidamo ka tirsan Booliiska Koonfur Africa, ayaa lasoo wariyay in dilka kadib ay goobta gaareen, sida caadada u ah ma jirto cid ay ciidanka Booliisku usoo qabteen dhacdadaasi.
Ganacsadaha labaad oo lagu magacaabi jiray Xuseen Ilkacase, ayay kooxo hubeysan ku dileen magalada Durban ee ka tirsan gobolka KwaZulu-Natal ee dalka Koonfur Africa.
Dilalkan ka kala dhacay magaalooyinka Cape Town iyo Durban, ayaa dhacay 24-kii saac ee u dambeeyay, waxayna ku biirayaan silsilado dilal ah oo kooxo burcad ah gudaha dalkaasi ugu gaysteen Soomaali badan oo halkaas u shaqo tagay.
About The Author
