Xilli khilaafaadka siyaasadeed ee ka dhex aloosan madaxda kooxda Riddada iyo siyaasiyiinta mucaaradka uu marayo meeshii ugu sarreysay, gabaabsina uu yahay muddo xileedka Gurguurte, ayay mucaaradku ku dhawaaqeen go’aamo culus oo ka dhan ah Villa Somalia.
War-murtiyeed kasoo baxay shir usoo dhamaaday mucaaradka oo shir-karaa’id uu ku akhriyay Cabdiraxmaan Ceynte, wasiirkii hore ee qorsheynta Riddada, kana mid ah hoggaamiyeyaasha mucaaradka Riddada ayay ku shaaciyeen go’aamo culus oo ay qaadan doonaan maalmaha soo socda.
Waxay sheegeen inay kulamo la yeesheen wakiilada gaalada beesha caalamka, nuqul ka mid ah warsaxaafadeedka ay soo saareen ayaana lagu yiri” Sidoo kale, waxaan wadatashiyo la yeelannay wakiillada beesha caalamka, gaar ahaan Mareykanka, Ingiriiska, Midowga Yurub, Turkiga iyo Qaramada Midoobay.”
Wixii ka dambeeya 15-ka bishan May ayay bayaanka ku sheegeen inay Gurguurte u aqoonsanayaan madaxweyne hore iyo nin iyaga la mid ah, waxayna muujiyeen inay iska dhicin doonaan nidaamka Xasan sheekh, si loo dhiso bay dhaheen dowlad sharciyad haysata.
Muddo isbuuc gudihiis ayay sheegeen inay ku shaacin doonaan nooca doorasho ee uu mucaaradku doonayo, maadaama Xasan Sheekh Maxamuud ku eedeeyeen in uu dastuur gaaleedkii u degsanaa meesha ka saaray, doorashooyin isaga u gaar ahna uu wato.
Maamul goboleedyada wakhtigoodu dhamaaday sida Koonfur-galbeed, Hirshabeelle iyo Galmudug, ayay soo jeediyeen in si deg dega looga qabto doorasho heshiis lagu yahay oo ka fog tan uu wato madaxa kooxda Riddada.
Dhul boobka xarka goosadka ah ee madaxda kooxda Ridadu ka wadaan magaalada Muqdisho, ayay cambaareeyeen, waxayna sheegeen in soo celinta dhulalka Xassan Sheekh boobay ay u dhisi doonaan maxkamad u gaar ah.
Waxay tilmaameen in kooxda Riddada ah ku howlan tahay abaabul ciidan, oo lagu caburinayo mucaaradka, waxayna ka digeen in kooxda Gurguurte maleeshiyadeeda u adeegsato dano siyaasadeed.
Go’aamada mucaaradka kadib Xafiiska Xasan sheikh Maxamuud, ayaa soo saaray warsaxaafadeed uu ku shaaciyay kulan la qaadan doono siyaasiyiinta ku midoobay golaha mustaqabalka ee mucaaradka, gogashan ayuu Xasan Sheekh sheegay inay furmi doonto 10-ka bishan May, loogana hadli doono arimaha la isku hayo.
Xildhibaan ka tirsan barlamaamka Ridada, gaar ahaan kuwa mucaaradka ah oo lagu magacaabo Cabdiladhiif Muuse Sanyare, ayaa shuurudo ku xiray in mucaaradku ka qaybgalaan kulanka Gurguurte, wuxuuna sheegay in marka koowaad uu Gurguurte joojiyo doorashooyinka uu ka wado maamul goboleedyada, ka laabto beddelka uu ku sameeyay dastuurka iyo in uu caddeeyo iyo wixii ka dambeeya 15-ka May uu la mid yahay mucaaradka.
About The Author
