Foreign Affairs oo ah majallada caalamiya oo kasoo baxda waddanka Maraykanka ayaa ka dayrisay xaaladda cakiran ee amni iyo siyaasadeed ee ka taagan dalka Itoobiya.
Warbixin ay majalladu baahisay maalmo ka hor, ayay ku sheegtay inay si weyn uga walaacsan tahay khataraha dagaallo cusub iyo xasillooni-darro sii socota oo kusii fidaya gudaha Itoobiya.
Waxay xustay warbixintu in gobolka Tigray ay ka jira kala qaybsanaan cusub oo u dhexeysa kooxaha TPLF iyo garabyo kale oo kasoo go’ay, taasoo kordhinaysa halista dagaal cusub.
Jabhadda Fano oo markii hore dawladda garab taagnaa ayaa hadda dagaal adag kula jira ciidanka federaalka, iyagoo sheegtay inay gacanta ku hayaan 80% gobolka Amxaarada.
Sidoo kale, jabhadda Oromada ee OLA ayay warbixintu ka dhawaajisay in iyaguna ay weli dagaal adag kula jiraan maamulka Addis Ababa ee garwadeenka R/Wasaare Abiy Axmed.
Majallada Foreign Affairs, waxa kale oo ay ka sanqarisay in xaaladda cakiran ee ka aloosan gudaha Itoobiya ay sidoo kale uga sii dartay khilaafka Addis Ababa iyo qaar ka mida dalalka deriska.
Warbixintu waxay ka digaysaa in Eritrea ama Masar ay taageeri karaan kooxaha hubeysan ee ka hawl-gala gudaha Itoobiya, taasoo sii xumeyn karta ayay tiri, amniga dalka.
Waxaa jirta ayay tiri warbixintu, cabsi weyn oo laga qabo in Masar iyo Eritrea ay maalgeliyaan oo ay hub siiyaan jabhaddaha ka hawl-gala gudaha Itoobiya si ay u wiiqaan nidaamka Abiy Ahmed.
Warbixintan ayaa kusoo aadaysa xilli maamulka Abiy Axmed ku hawlan yahay doorashooyin si weyn la iskugu khilaafsan yahay oo qabsoomiddooda loo asteeyey 1-da Juun oo ku beegan maalinta berrito ah.
Fano ayaana dardar xooggan gelisay weerarradeeda tan iyo Maarso 2026, iyadoo caqabad ku noqotay qorshaha maamulka Addis Ababa ee qabashada doorashooyinka baarlamaanka federaalka Itoobiya.
About The Author
