Sida ay wararku tibaaxayaan, kooxda riddada ee garwadeenka uu ka yahay Xasan Sheekh Maxamuud ayaa si rasmiya u qiratay kuna faantay kulan ay magaalada Nairobi ku yeesheen safiirka kooxda Villa Soomaaliya iyo Safiirka maamulka Yahuudda u fadhiya dalka Kenya.
Wasiirka Arrimaha dibedda ee kooxda riddada, Cabdisalaam Dhaay ayaa sheegay inay ka war hayeen isla markaana ay la socdeen kulanka magaalada Nairobi ku dhex-maray safiirkooda Kenya, Jibriil Ibraahim Cabdulle iyo safiirka Yahuudda, Jidcuun Biihaar.
Waxa kale oo wasiirku beeniyey warar saacadihii lasoo dhaafay lagu baahiyey baraha bulshada oo sheegayay in kooxda Gurguurte ay u yeeratay safiirkeeda Kenya, waxaanu ku nuuxnuuxsaday in safiirku uu shaqadiisa gudanayay, wax khalad ah oo dhacay-na uusan jirin.
Kulanka labada safiir ayaa yimid kadib markii safiirka kooxda riddada Soomaaliya uu ka qayb-galay shir ay Yahuuddu soo qabanqaabisay kuna qabsatay magaalada Nairobi, kaas oo uu si rasmi ah u furay safiirka Sahaayinada ee Kenya, Jidcuun Biihaar.
“Safiir Jibriil Ibraahim Cabdulle wuxuu shirka uga qeyb-galay isaga oo gudanaya waajibaadkiisa diblomaasiyadeed ee dalka. Sidaa darteed, wararka sheegaya in safiirka loo yeeray waa kuwo aan sax ahayn.” Ayuu yiri wasiirka khaarajiga ee kooxda riddada Soomaaliya.
Safiirka Yahuudda u fadhiya dalka Kenya ayaa saacadihii lasoo dhaafay bartiisa xiriirka bulshada ee Facbook lagu baahiyey sawirro muujinaya kulanka ay magaalada Nairobi ku yeesheen isaga iyo safiirka riddada Soomaaliya.
Falanqeeyayaasha ayaa sheegaya in kooxda Villa Soomaaliya ay khiyaano weyn kula kacday ummadda Soomaaliyeed, iyagoo wax laga xumaado ku tilmaamay laba-wajiileynta Gurguurte, xilli maamulka Yahuuddu doonayo inuu la wareego qaybo ka mida Soomaaliya.
Si kastaba ha ahaatee, qiraalka kasoo yeeray Villa Soomaaliya ayaa bannaanka keenay wejiga dhabta ah ee kooxda riddada, iyadoo maalmo ka hor Xasan Sheekh Maxamuud uu si adag uga hadlay isla markaana sheegay in marnaba ayasn aqbalayn xiriirka dhex-maray maamullada Hargeysa iyo Talaabiib.
About The Author
