Murtad C/Raxmaan-Cirro, madaxa maamulka ashahaado-la-dirirka Somailland ayaa gelinkii hore maanta ka degay garoonka diyaaradaha ee magaalada Talaabiib, halkaas oo mas’uuliyiin ka tirsan maamulka Yahuuddu ay si weyn ugu soo dhaweeyeen.
Murtad Cirro iyo wefti uu hoggaaminayo ayaa la sheegay in garoonka diyaaradaha ay kaga hor-tageen isla markaan ay kusoo dhaweeyeen mas’uuliyiinta sare maamulka Sahaayinada, oo ka mid yahay madaxweynaha Yahuudda, Isaaq Herzog.
Booqashadan oo warbaahinta Yahuuddu ay sheegtay inay tahay bog cusub oo furmay maamullada Hargeysa iyo Talaabiib, ayaa noqonaysa tii labaad ee Cirro uu ku tago halkaasi, maadaama ay jirtay booqasho qarsoodiya oo tan ka horreysay.
Wargeyska The Jerusalem Post, ayaa sheegay in qorshayaasha booqashadan ay ka mid tahay furitaanka safaarad-ku-sheegta maamulka riddada Somaliland ee magaalada Qudus iyo kulamo lagu ballaarinayo arrimo ay ka mid yihiin iskaashiga dhinacyada amniga, ganacsiga, iyo wax ay ku sheegeen horumarinta gobolka.
Intaas kadib, waxa la sheegay in Cirro uu kulamo diblomaasiyadeed la yeelan doono madaxweynaha Yahuudda, isla markaana uu maanta ka qayb-gali doono wax lagu sheegay “qado qaran” oo uu la qaadan doono Wasiirka Arrimaha Dibadda Yahuudda, Jidcoon Sa’ar.
Wargeysku waxa kale oo uu sheegay in murtad Cirro muddada uu ku gudo-jiro booqashadiisa uu ubax dhigi doono Mount Herzl oo ah xabaalaha rasmiga ah ee lagu aaso madaxda Yahuudda iyo sidoo kale askarta Sahaayinada ee ku dhimata dagaallada.
Warbixintu waxa kale oo ay sanqarisay in sidoo kale Cirro uu booqan doono Yad Vashem, oo ah xarun lagu xuso xasuuqqii Yuhuudda ee Nazi-gii Jarmalka, kaas oo uu Hitler uu hoggaaminayay intii u dhaxaysay 1933 ilaa 1945.
The Jerusalem Post, waxa kale uu sheegay in Cirro uu sidoo kale inta uu ku gudo-jiro booqashadiisa uu geed ku beeri doono beer weyn oo ku taalla magaalada Qudus oo lagu magacaabo Grove of Nations, taas oo ay leeyihiin ururka deggaamaynta ee Yahuudda.
Berri oo Isniin ah ayuu wargeysku sheegay in Cirro uu sidoo kale la kulmi doono Ra’iisul Wasaaraha Yahuudda Benjamin Netanyahu, iyadoo kulankaasi ka gadaal-na la filayo inuu si rasmi ah xarigga uga jaro safaarad-ku-sheegta riddada Somaliland ee magaalada Qudus.
Sida ay sheegeen ilo xog-ogaal ah, C/Raxmaan Cirro waxay booqashadiisu socon doontaa ilaa shan cisho ah, isagoo muddadaasi ay u qorshaysan tahay la-kulanka wasiirro iyo mas’uuliyiin ka tirsan maamulka Yahuudda iyo sidoo kale hoggaamiyeyaal ganacsi.
Sidoo kale Cirro waxa la sheegay inuu booqon doono Knesset oo ah xarunta baarlamaanka Yahuudda iyo sidoo kale goob ay Sahaayinadu ku xusto weerarkii ay Xamaas fulisay 7-dii Oktoobar ee 2023, kaas oo Yahuud fara badan dhegta dhiigga loogu daray.
Maamulka Somaliland tallaabadan uu qaaday ee uu safaaradda uga furanayo Qudus, ayaa ka dhigan in magaaladaasi oo ah qibladii koowaad ee muslimiinta ay u aqoonsadeen caasimadda maamulka sahyuuniga ah ee Yahuudda.
About The Author
