Wararka ka imaanaya wadanka Kenya ayaa sheegaya in weerar hubeysan oo ka dhacay degmada Wajeer lagu dilay dad asalkoodu yahay Kenyaan oo u shaqeynayay wasaaradda Waxbarashada wadankaasi.
Weerarka oo dhacay saaka aroortii ayaa lala beegsaday iskuulka hoose ee Qarsa halkaas oo ay ka howlgelayeen shaqaale katirsan wasaradda Waxbarashada, ugu yaraan sedax Macallin oo katirsan wasaraadda ayaa la xaqiijiyay in lagu dilay weerarka.
Stephen Ng’etich oo ah Taliyaha ciidamada Booliska Gobolka Wajeer ayaa warbaahinta u xaqiijiyay in rag hubeysan ay gudaha ugaleen iskuulka ayna toogasho ku dileen sedax Macallin oo dhammaantood ahaa Kenyaan asal ah oo aan kasoo jeedin gobolka Somaalida NFD.
Col. Max’med Sheekh oo ah Taliyaha melleteriga gobolka ayaa isna sheegay in weerarka macallimiinta lagu dilay uu xigay qarax lala helay gaari Ciidan oo gurmad ahaan ugaaray iskuulka Qarsa ee weerarka kala kulmay xoogag lagu tuhmayo in ay katirsan yihiin Al Shabaab.
Wuxuu sheegay in Miino lagu aasay iskuulka hareertiisa ay ku qaraxday gaari ciidan balse wax khasaara ah uusan kasoo gaarin saraakiisha Booliska Kenya, ” Waxaan idiin xaqiijin karaa in Miino lagu aasay wadada hareeraheeda ay ku qaraxday mid kamida gaadiidkeena balse wax dhibaata ah sooma gaarin saraakiisha ciidanka” ayuu yiri Col.Max’med Sheekh oo kamid ah saraakiisha ciidanka.
Dowladda Kenya ayaa weerarkan ku eedeysay in ay mas’uul ka tahay Xarakada Al Shabaab oo sanadadii lasoo dhaafay si firfircoon weerarro uga fulinaysay gobolka Waqooyi Bari loo bixiyay ee gumeysiga kujira, isbuucii lasoo dhaafay ayay aheyd markii xoogaga Al Shabaab ay weerar madaafiic ah ku qaadeen saldhigga ciidanka Kenya ee deegaanka Ceelraam.
About The Author
