Hoggaamiyaha dalka Mareykanka Donald Trump ayaa ku dhawaaqay in uu shaqada ka Eryay Rex Tillerson oo ahaa wasiirka arrimaha dibadda tan iyo bishii Janaayo sanaddii 2017.
Trump ayaa Farriin uu ku qoray Bartiisa Twitterka ku sheegay in khilaaf muddo soo jiitamayay oo kala dhaxeeyay Rex Tillerson uu ugu dambeyn go’aansaday in uu xilka ka qaado.
Mike Pompeo oo horay u ahaa agaasimaha hay’adda Sirdoonka CIA ayaa loo magacaabay wasiirka cusub ee arrimaha dibadda Mareykanka, Donald Trump ayaa warbaahinta u sheegay in Tillerson ay isku khilaafeen arrimo dhowr ah sida arrimaha Barnaamijka Niyugleerka Iiraan iyo wadahadallada waqooyiga Kuuriya.
“Waxaa jiray khilaaf muddo soo jiitamayay oo u dhaxeeyay aniga iyo Rex Tillerson, xilka qaadistiisa kalama tashan oo aniga ayaa go’aansaday” ayuu yiri Donald Trump.
Tan iyo markii uu xilka madaxtinimada Mareykanka qabtay Donald Trump ayuu wajahayay qulqulatooyin dhanka siyaasadda ah waxaana shaqadii ay hayeen iska casilay tobaneeyo mas’uul oo ay kamid ahaayeen wasiirro iyo lataliyayaal.
About The Author
