Ciidamada Kenyaatiga ee ku sugan gobolka Gedo ee koofurta Soomaaliya ayaa sii wada tacadiyada ka dhanka ah shacabka gobolkaas iyagoona maanta falal dil iyo dhac ka geystay gudaha degmada Ceel Waaq.
Dadka deegaanka ayaa sheegay in askarta Kenyaatigu ay soo qabteen 2 nin oo reer Miyyi ah kuwaas oo Seyladda Suuqa Xoolaha ee Ceel Waaq u soo safarsaday Geel, waxaana ka dib raggaasi loola dhaqaaqay goob aan la ogeyn.
Ciidamada Kenyaatiga ayaa ka dib dilay labada nin waxeyna ka qaateen lacagihii ay wateen, arrinkaas oo meesha ka saaray sheegashooyinka beenta ah ee Ciidamada Kenya in ay dalka u soo galeen Nabad Ilaalin iyo difaaca dalkooda.
Dhawaan ayay aheyd markii ay Ciidamo Kenyaanti ah kufsi kula dhaqaaqeen hablo Soomaaliyeed isla gobolka Gedo, laakin ma jirin wax tallaabo ah oo laga qaaday inkastoo dadka Soomaaliyeed ay yihiin kuwa dulmi diid ah oo ka kaca xadgudubyada noocaasi ah.
Sidoo kale Ciidamada Kenyaatiga ayaa wiiqaya dhaqaalaha ganacsatada, waxaana dhawaan ay dumiyeen xarumo ay laheyd Shirkadda Isgaarsiinta Hormuud, iyadoona shirkaddu ay maanta soo saartay baaq cabasho ah oo ay ka gudbineyso falalkaasi.
About The Author
