50 Qof Kenyaan Ah Oo Ku Dhintay Shil Ka Dhacay Duleedka Magaalada Nairobi.

Inta la xaqiijiyey illaa 50 qof ayaa lagusoo warramayaa in subaxnimadii Saaka ay shilkan ku geeriyoodeen kuwaas oo kasoo baxay dhanka Magaalada Nairobi kuna sii jeeday magaalada Kakamega oo dhacda galbedka wadanka kadib markii gaariga ay wateen uu ka baxay dariiqa uuna ku dhacay Kanaal biya mareen ah.

Laba qof oo kaliya ayaa lagusoo warramayaa in shilkan ay ka badbaadeen kuwaas oo la dhigay isbitaal caafimaad oo ka ag dhawaa goobta uu shilku ka dhacay iyagoo qaba dhaawacyo kala duwan sida ay xaqiijiyeen saraakiisha Police-ka gobolka Rift Valley.

Dadka deegaanka ayaa sheegay in dadka gaariga saarna badankooda ay kasoo jeedeen gobolka Kericho ee dhaca galbeedka wadanka shilkuna uu dhacay xilli habeen ah taas oo adkeysay in gurmadkii loo baahnaa ay helaan sidaasna ay ugu dhinteen biyihii Kanaalka marayey.

Hey’adda Bisha Cas  xarunteeda magaalada Nairobi ayaa barteeda twitterka ku xaqiijisay in gaarigu uu dhowr jeer iska daba rogmaday inkastoo ay shaaciyaan in wali aysan heynin macluumaad dheeraad ah oo ku aaddan qaabkii ay wax u dheceen.

Shilalka ayaa wadanka Kenya ka noqday kuwasoo laa laabta oo si joogta ah uga dhoco haba ugu badnaate dariiqa dheer ee isku xira magaalada Nairobi iyo Mombasa oo kamid ah, dariiqyada ugu isticmaalka badan gudaha wadanka Kenya.

Tirakoob rasmi ah oo dowlada Kenya ay soo saartay ayaa lagu sheegay in dad gaaraya 3Kun oo qof ay ku dhinteen Shilal ka dhacay gudaha wadanka Kenya sanadki 2017ka oo kaliya, halka Hey’ad gaaleedka WHO-na ay sheegtay in dadka shilalki 2017ka wax ku noqday ay kor u dhaafayaan 12Kun oo qof.

Bishi December ayay aheyd markii sidan oo kale ilaa 36 qof oo Kenyan ah ay ku dhinteeen Bariga wadanka, kadib markii ay isku dheceen gaari Bas ah iyo Gaari kuwa Xamuulka qaada ah, halka sanadki 2016-kana ilaa 40 qof ay ku dhinteen markii Booyad Shidaal oo soo fariin goosatay ay ku dhacday gaari kale, kadibna ay ku qaraxday goob suuq ah oo dad badan ay ka dukaameysanayeen.