Warar dheeraad ah ayaa kasoo baxaya dagaallo khasaara badan dhaliyay oo shalay deegaan katirsan gobolka Sool ku dhaxmaray maleeshiyaad beeleedyo hubeysan.
Wararka ka imaanaya gobolka Sool ayaa sheegaya in ugu yaraan 50 qof ay ku dhinteen iska hor’imaadyo xooggan oo shalay ka dhacay deegaanka Dhumay oo hoos yimaad magaalada Laascaanood.
Goob joogayaal ayaa sheegay in khasaaraha ugu badan uu ka dhashay madaafiicda Hoobiyaha oo maleeshiyaadka dagaallamay ay isku weydaarsadeen dhul dhagax leh.
Isbitaallo kuyaal magaalada Laascaanood ayaa ladhigay dhaawacyada 85 ruux oo isugu jira shacab rayid ah iyo dhinacyadii dagaallamayay, guddoomiyaha gobolka Sool ayaa ugu baaqay maleeshiyo beeleedyada dagaallamaya in ay si shuruud la’aan ah xabadda u joojiyaan.
Gaadiidka Tiknikada loo yaqaan ayaa dagaalkii shalay ka qeyb qaadanayay, salaadiinta gobolka Sool ayaa warbaahinta u sheegay in ay wadaan dadaallo ay ku kala qaadayaan maleeshiyaadka qaab beeleedka u dagaallamaya.
Gobollada Sool iyo Sanaag ayaa kamid ah meelaha ugu dagaal beeleedyada badan dalka Soomaaliya waxaana jira dhul daaqsimeed iyo seerooyin gummeystihii Ingiriiska jeexay oo ay isku dilayaan dadka reer miyiga ah.
About The Author
