Barakac xooggan ayaa ka billowday xaafadaha magaalada Beledweyne ee xarunta gobolka Hiiraan ee bartamaha Soomaaliya, halkaas oo uu fatahaad ka sameeyay wabiga Shabeelle oo bartamaha ka mara magaaladaasi, inta badana laga soo tabiyo saamaynta ay reebto fatahaadda uu sameeyo wabigaasi oo ka mid ah wabiyada mara koonfurta iyo bartamah Soomaaliya.
Dadka ku dhaqan magaalada Beledweyne, ayaa soo sheegay in maanta roobab lagu diirsaday ay ka da’een magaalada, waxaana roobka dhinac socda fatahaadda wabiga, kaas oo keenay in qoysas badan at vka barakacaan qaybo ka mid ah xaafadaha magaalada Beledweyne, waxaana xaafadaha maanta ay dadkeedu barakaca sameeyeen ka mid ah Buunda-weyn iyo Howlwadaag, kadib markii uu wabigu karkaarka soo jabsaday kuna fatahay jihooyinka Doonsubagle iyo Faarax geedi ee kala dhaca xaafadaha Buunda-weyn iyo Howlwadaag.
Ilo wareedyada ku sugan Beledweyne waxay sheegeen in labadan xaafadood ee kala ah Buundo-weyn iyo Howlwadaag ay ahaayeen xaafadaha aysan saamaynta ku yeelan fatahaadda uu maalmihii lasoo dhaafay magaaladaasi ka sameynayay wabiga Shabeelle, balse maanta dadkeedu billaabeen inay isaga barakacaan wallow qoysas badan weli deegaan ku yihiin xaafadahaasi.
Muuqaallo lasoo geliyay baraha bulshada, ayaa muujinayay biyo aad u badan oo kusoo rogmaday xaafadaha magaalada Beledweyne, fatahaaddii ugu xoogganayd ayaa magaaladaan la sheegay inay ku dhufatay dayrtii lasoo dhaafay, taasi oo ilaa imika aysan dadku kasoo kabsan.
About The Author
