Wararka ka imaanaya waddanka Itoobiya ayaa sheegaya in weeraro cusub lagu beegsaday xarumo dadweyne oo kuyaal gobolka Axmaarada, halkaas oo ay ka socdaan dagaallo culus oo u dhaxeeya xabashida.
Warbaahinta maxalliga ah ee waddankaasi waxay sheegtay in Weeraradii ugu dambeeyay ee ciidamada millatariga Itoobiya ay u adeegsadeen diyaaradaha aan duuliyaha lahayn ee Drones-ka, lagu dilay laba xubnood oo rayid ah, halka ay ku dhaawacmeen afar kale.
Duqayntan ayaa lasoo wariyay inay si gaar ah uga dhacday deegaanka Alem Ketema oo hoostagta degmada Merhabeete ee ismaamulka Axmaarada ee Woqooyiga Shoa, sida laga soo xigtay ilo dhanka deegaanka ah.
Warbaahinta Axmaaradu waxay sheegtay in diyaarad aan duuliye lahayn ay weerar ku beegsatay meel u dhow dugsi School ah abaarre 1-dii duhurnimo ee wakhtiga maxaliga ah, Maamulka dugsiga la duqeeyay ee kuyaal Alem Ketema ayaa xaqiijiyay in la joojiyay shaqada dugsigaasi, wuxuuna intaas ku daray in weerarka lagu beegsaday agagaarka dugsiga sare ee Patriots, kaasoo ay wax ku bartaan ardayda fasalada 9ilaa 12-aadka oo tiradoodu kor u dhaafeyso 2600.
Itoobiya waxaa dhexdeeda ka socda xasuuq ba’an oo ay isu gaysanayaan ciidamada millatariga iyo qowmiyadaha kasoo horjeedo, gaar ahaan kuwa Axmaarada, waxaana weerarada tooska ah iyo kuwa cirka ahba ay sababeen barakac xooggan iyo burbur baahsan.
About The Author
