Kooxo Afrikan ah, ayaa eedaymo culus oo xasuuq ah u jeediyay ciidamada dowladda Tanzania, kuwaas oo tan iyo doorashadii dalkaasi ka dhacday 29-kii Oktoobar dilay 3,000 qof oo rayid ah.
Warbixintan waxaa soo saaray inka badan 40 urur oo Afrikaan ah, kuwaas oo warbixintooda kusoo bandhigay magaalada Nairobi, waxayna ku sheegeen in dilalkaasi dhaceen kadib doorashadii guud ee Tanzania, taas oo ay ahayd mid qalalaase iyo dhiig badan uu ku daatay, kana dhasheen eedeymo ku saabsan musuq, caburin iyo internet-ka oo laga jaray guud ahaan wadanka oo dhan, si loo qariyo waxa socday.
Bayaan wadajir ah oo ay soo saareen ururadan ayaa nuqul ka mida lagu yiri “Ilaa 7-dii Noofambar 2025, ugu yaraan 3,000 oo qof ayay ciidanka amaanka Tanzania dileen, halka weli kumannaan qof la la’yahay, iyadoo ay socoto isku day lagu daboolayo xaqiiqada oo ka mid tahay joojinta internet-ka, in la xanibo xawaarihiisa, tiradan waxaa laga yaabaa inay ka hooseyso tirada dhabta ah ee dadka la dilay.”.
Waxay kooxahan isugu jiraan ururo sheegta inay u doodaan xuquul insaanka, qareenno, iyo kooxo kale oo ka socda 10 dal oo Afrikaan ah, waxay sheegeen in ay hayaan sawirro iyo muuqaallo ay warbaahintu heli karto oo caddeyn u noqon kara dhacdooyinka xasuuqa ah ee ay gaysteen ciidanka Tanzaaniya.
Wakaaladda wararka ee Anaadool ayaa sheegay in haddii tirada dhimashada ee lagu sheegay warbixinta ay xaqiiqo noqoto ay noqonayso mid ka mid ah tacaddiyaddii siyaasadeed ee ugu dhimashada badnaa ee ka dhaca bariga Afrika sannadadan dambe.
Urur gaaleedka qaramada midoobay iyo ururo u dooda xuquuqda aadanaha ayaa horey u xaqiijiyay in ay jireen dad la dilay iyo kuwa kale oo la xiray doorashada kaddib, ururadan waxay sheegeen in dadka la dilay ay ka mid ahaayeen dibadbaxayaal, caruur waddooyinka ku nool, shaqaale caafimaad, iyo dad shacab ah oo aan qayb ah ka ahayn mudaaharaadyada, waxay sidoo kale dowladda ku eedeeyeen in dalka oo dhan ka qoday xabaal wadareedyo, si gaar ahna waxay u xuseen deegaanka lagu magacaabo Mabwepande, si loo qariyo bay dhaheen caddeynta dadka la xasuuqay.
Warbixinta oo aad u dheer waxay intaa ku dartay in cisbitaallada ay si dhow u ilaaliyaan ciidamo Booliis ah iyo hay’ado sirdoon, kuwaas oo shaqadoodu ay tahay inay dadka mobillada ka qaadaan, kaddibna tirtiraan muuqaallada, isla markaana ay qaraabada u diidaan inay booqdaan maydadka, Dhakhaatiirta iyo kalkaaliyeyaasha caafimaadka ayay sidoo kale dowladdu ku amrtay bay dhaheen inay si ula kac ah u dhaawacaan ama u dilaan dadka dhaawacyada culus qaba ee rasaastu haleeshay.
Madaxweynaha dib isu dooratay ee Tanzania, haweenayda lagu magacaabo Saamiya Suluxu, ayay ku baaqeen inay is casisho, halka saraakiisha ciidan ee ammaankana ee arrintan lagu eedeeyay ku baaqeen in la maxkamadeeyo.
Madaxda Afrikaanta ah waxay caan ku yihiin inay kuraasta dhiig ku gaaraan, qaar kale ayaa iska jooga sannado badan iyaga oo talada isku soo koobay oo aysan jirin cid la tartanta, halka dalalka qaarna ay madax ka yihiin generallo afgambi ku qabsaday talada dalalkaasi.
About The Author
