Waxaa sii xoogaysanaya ugaarsiga iyo dilalka qorshaysan ee sida gaarka ah loogu beegsanayo bulshada Soomaaliyeed ee ku dhaqan waddanka Koonfur Afrika.
Labo wiil oo Soomaali ah magacyadoodana lagu sheegay Cabdullaahi Cali iyo Saddaam Maxamed ayaa fiidkii xalay lagu dilay tukaan ay ka wada shaqeynayeen oo ku yalla magaalada Port Elizabeth ee gobalka Eastern Cape ee dalka Koonfur Afrika.
Weerarkan ayaa la sheegay in ay fuliyeen burcad hubaysan oo Koonfur Afrikaan ah, kuwaas oo intii ay ku gudo-jireen weerarkaasi sidoo kale dhaawac u geystay wiil kale oo saddexaad oo isna u dhashay dalka Soomaaliya.
Mid ka mid ah labada wiil ee dhintay ayaa ku qur-baxay isla goobtii lagu soo weeraray, halka midka kalena isagoo dhaawac ah loola cararay cusbitaalka, balse wax yar kadib isna uu u geeriyooday dhaawacii soo gaaray.
Jaaliyadda Soomaaliyeed ee ku nool Koonfur Afrika ayaa si weyn uga anfariirtay dhacdadan foosha xun, waxaanay walaac xooggan ka muujiyeen weerarradan sida gaarka ah loogu ugaarsanayo oo xarkaha sii goostay muddooyinkan u dambeeyey.
Usbuucyadii lasoo dhaafay ayay ahayd markii bannaan-baxyo waaweyn oo looga soo hor-jeedo ajaaniibta ay ka dhaceen waddanka Koonfur Afrika, iyadoo muddadii ay mudaharaaddadaasi socdeenna la boobay meherado ay lahaayeen ganacsato Soomaaliyeed.
About The Author
