Urur-gaalleedka caalamiga ah ee sheegta inuu ka shaqeeyo waxa loogu yeero Xuquuqul Aadanaha ee Amnesty International ayaa soo saaray digniin culus oo ku saabsan dagaallada dib uga qarxay qaybo ka mida galbeedka gobolka Tigray ee waqooyiga dalka Itoobiya.
Dagaalladan cusub ayay hey’addu sheegtay in khatar weyn ay gelinayaan dadka rayidka ah, xilli bulshooyinka ku dhaqan gobolka Tigrey ay weli la tacaalayaan saamaynta xasuuqyadii dhacay intii uu socday dagaalkii 2020–2022.
Amnesty waxay ka dhawaajisay in colaadda cusub ay keeni karto xadgudubyo hor leh oo ka dhan ah xuquuqda aadanaha, xilli weli caddaalad aan loo helin ayay tiri, dhibaatadii hore.
Ururku wuxuu ku baaqay in dib loo soo celiyo hababkii caalamiga ahaa ee baaritaanka waxa loogu yeero xuquuqda aadanaha, ka dib markii dowladda Xabashida Itoobiya ay joojisay wadashaqayntii kala dhaxaysay guddiyada ururka gaallada Qaramada Midoobay iyo Midowga Afrika.
Sidoo kale ururku, wuxuu sheegay in maamulka TPLF haatan ka arrimiya gobolka Tigray uu labadii bilood ee u dambeeyay kordhiyay cadaadiska uu ku hayo rayidka isla markaana uu bilaabay in si qasab ah uu ku askariyeeyo dadka shacabka ah.
Warbixintu waxay xustay in gobolkan ay horey uga dhaceen xadgudubyo baahsan oo ay geysteen ciidamada federaalka Itoobiya, kuwa Ereteriya, iyo xoogagga Tigray intii u dhaxaysay 2020 ilaa 2022, kuwaas oo loo aqoonsaday dembiyo dagaal.
Sabtidii lasoo dhaafay ayay ahayd markii dagaal culus oo la isku adeegsaday hubka noocyadiisa kala duwan uu ciidanka Xabashida Itoobiya iyo jabhadda TPLF ku dhex-maray galbeedka gobolka Tigrey, gaar ahaan deggaanno ku dhow xad-beenaadka Suudaan.
About The Author
