Ku dhawaad 40 askari oo ka tirsan ciidanka Xabashida Itoobiya ayaa dhimasho iyo dhaawac ku noqday weerar ka dhacay gobolka Amxaarada iyo in ka badan 20 qof oo rayid ah oo lagu afduubtay deegaan u dhow caasimadda Addis Ababa.
Hawl-gal qorshaysan oo maleeshiyaadka Fano ay jimcihii shalay ka fuliyeen gobolka Amxaarada, gaar ahaan deggaanka Gonder ayaa lagu soo warramayaa in lagu dilay sarkaal sare oo ka tirsanaa ciidanka Xabashida Itoobiya iyo ugu yaraan 15 askari oo kale oo ka mid ahayd ilaaladiisa, sida ay soo tebiyeen qaar ka mida warbaahinta maxalliga ah ee Itoobiya.
Weerarkan oo si gaar ah uga dhacay agagaarka degmada Delgi ee deegaanka Kurabas ayaa sidoo kale lagu dhaawacay in ka badan 20 askari, waxaana dhacdadan warbaahinta la wadaagay Kornayl Abere Azanaw oo horey u ahaa sarkaal ka tirsan ciidanka Xabashida Itoobiya, haatanse ka mida saraakiisha jabhadda Fano ee deggaanka Gonder.
Kornayl Abere oo la hadlay warbaahinta Ethio Focus ayaa ku tilmaamay hawl-galkan mid gaar ah oo la qorsheeyey kadib markii la darsay dhaqdhaqaaqa ciidankan oo xilligaasi kasoo kasoo baxay xero ciidan oo u dhow aagga uu weerarku ka dhacay.
Sarkaalka la dilay ayaa lagu magacaabi jiray Kornayl Asseged, waxaana la beegsatay isagoo wata labo baabuur iyo 35 askari sida uu xaqiijiyey Kornayl Abere Azanaw. Waxaana sida la sheegay hawl-galkaasi loo xil-saaray guuto ka tirsan jabhadda Fano ee ka hawl-gasha deegaannadaasi.
Weerarkan ayaa kusoo aadaya iyadoo arbacadii lasoo dhaafay in ka badan 20 qof oo rayid ah lagu afduubtay aagga bariga Shawa ee gobolka Oromada, gaar ahaan meel qiyaastii 2 saacood oo kaliya u jirta caasimadda Itoobiya ee Addis Ababa.
About The Author
