Waxaa iska soo daba dhacaya warbixinada la xiriira kiisaska dilalka ah ee ka dhanka ah ganacsatada Soomaaliyeed, kuwaas oo laga soo tabinaayo dalka Koonfur Afrika oo ka mid ah dalalka ugu badan ee Soomaalida loogu gaysto dilalka iyo dhaca hantiyeed.
Saacadihii lasoo dhaafay waxaa gudaha dalkan dil loogu gaystay ganacsade ka mid ah dhalinyarada Soomaaliyeed ee dalkaasi u shaqo tagay, sida ay soo xaqiijiyeen ilo wareedyo xog-ogaal ah.
Goobjoogeyaal ku sugan Koonfur Afrika ayaa soo sheegay in dilka oo dhacay galinkii dambe ee shalay uu si gaar ah kaga dhacay xaafadda Kraaifointen ee ka tirsan magalada cape town, halkaas oo lagu dilay Saciid Cismaan Cosoble oo caan ku ahaa( saciid qaxwo).
Faahfaahin dheeraad ah lagama bixin qaabka uu dhacay dilka ganacsadahan Soomaaliyeed ee lagu dilay Cape Town oo ka mid ah caasimadaha saddexda ah ee uu leeyahay dalka South Africa.
Waxay dhacdadan kusoo beegmaysaa xilli shan maalmood ka hor dhacdo tan la mid ah ay ka dhacday mid ka mid ah xaafadaha degmada Guguletu ee ka tirsan magaalada Cape Town, halkaas oo lagu dilay Maxammed Cali Culusow oo ka mida dhalinyarada ganacsatada ah, waxaana lagu toogtay afaafka hore ee dukaankiisa.
About The Author
