Ugu yaraan 30 qof ayaa dhimatay halka 300 oo kale ay dhaawacyo soo gaareen kadib markii uu dhulgariir xooggan ku dhuftay magaalooyin dhaca waqooyiga Afghanistan.
Hay’adda Maareynta musiibooyinka ee taabacsan Imaarada Islaamiga ah ayaa sheegtay in dadka ugu badan ay ku dhinteen duleedka magaalada Mazaaru shariif ee wilaayada Balkh halkaas oo uu ku dhuftay dhulgariir cabirkiisa lagu qiyaasay 6.3 Rikhtar.
Afhayeenka xukuumadda Afghanistan ayaa warbaahinta usheegay in saacado kadib markii uu dhacay dhulgariirka 1aad ay wilaayada Samanjaan lakulantay dhulgariir kale waxaana ka dhashay khasaara isugu jira dhimasho,dhaawac iyo burbur hantiyadeed oo baaxad leh.
Amiirka Imaarada Islaamiga ah ayaa faray dhammaan mu’asasaadka xukuumadda in ay si degdeg ah ugu gurmadaan dadka ku waxyeeloobay dhulgariiradan.
Muuqaallo uu baahiyay Telefeshinka Rasmiga ah ee Imaarada Islaamiga Afghanistan ayaa muujinayay dhibanayaal ay ciidamada gurmadka deg-degga ah kasoo saarayaan burburka hoostiisa.
Wilaayada Balkh waxaa la sheegay in ay go’een qaar kamid ah waddooyinka muhiimka ah arrinkaas oo caqabad ku noqday gurmadka dhulka balse ciidamada imaarada oo wata diyaaradaha qumaatiga ukaca ayaa dad badan kasoo badbaadiyay tuulooyinka fog.
Musiibooyinka rabaaniga ah sida dhulgariirrada iyo daadadka ayaa sanadadan dambe kusoo noq-noqonayay wadanka Afghanistan ah dalka buuro iyo dhul kala sarreeya caan ku ah.
About The Author
