Xiisad dagaal oo u dhaxaysa Soomaalida iyo mid ka mid ah qowmiyadaha dega dalka Kenya, ayaa ka taagan deegaanno ka tirsan ismaamulka Kitui, halkaas oo laga soo calaamadiyay isku dhacyo hubeysan oo dad ku le’deen.
Maanta waxaa gebi ahaanba joogsaday gaadiidkii Basaska ee sida maalin laha uga bixi jiray Nairobi iyo magaalooyin kale, kuwaas oo aadi jiray magaalada Gaarisa ee dhulka NFD, markii basas ay saarnaayeen dad Soomaaliyeed lagu weeraray ismaamulka Kitui.
Shirkadaha Basaska, ayaa diiday inay u safraan Gaarisa, iyaga oo sheegay in xaaladda waddada ay tahay mid halis ah, inta ka hagaagaysana ay shaqada ka fadhin doonaan, dadka Soomaalida ah ee maanta tagay xafiisyada Tikidhada laga jarto ee xaafadda Islii ayaa dib loo celiyay, loona sheegay inuusan jirin wax safar ah oo Gaarisa aadi kara.
Xiisadda colaadeed ee u dhaxaysa Soomaalida iyo Kenyanka, ayaa si gaar ah uga taagan inta u dhaxaysa magaalooyinka Mwingi iyo Nguni, halkaas oo ay degaan qowmiyad lagu magacaabo Mukambada.
Xiisadda ayaa ka billaabatay kooxo hubeysan oo kasoo jeeda Mukambada oo si bareer ah u dilay xoolo dhaqato Soomaaliyeed, waxaana dhacdadaas xigay dil kale oo ka dhacay tuulada Tseikuru, kaasi oo loo gaystay 7 qof oo kasoo jeeda qowmiyadda Mukambada, booliiska Kenya ayaana weerarkaa ku tilmaamay mid aargoosi ah oo ay ula jeedaan inay Soomaali ka dambeysay.
Wixii labadaas dhacdo ee weerarka ah ka dambeeyay xaaladda waddada aadka u mashquulka badan ee isku xirta Nairobi iyo Gaarisa ayaa noqotay mid halis ah oo lagu weeraro Soomaalida safarka ah, shalay oo ay ugu dambeysay gaadiid nooca kuwa Bus-ka ah oo ay ku safrayeen Soomaalida, ayaa dhagxaan lagu weeraray, dad careysan oo deegaanka ayaana weerarkaasi ka dambeeyay.
Maanta waxaa xirnaa goobaha ganacsi ee Soomaalidu ku leeyihiin magaalo lagu magacaabo Mwingi, wallow markii dambe shacab careysan oo dadka deegaanka ah ay xoogga ku galeen ganacsiyada xiran kadibna jabsadeen, wixii agabyo ah ee yiillay na boobeen.
Sawirro iyo muuqaallo ku baahay baraha bulshada, ayaa muujinayay dukaamo ganacsi oo la jabsaday iyo badeecooyinkii ku jiray oo lala cararayo, weli waxaa taagan oo faraha ka baxday xiisadda colaadeed ee u dhaxaysa Soomaalida iyo dadka Kenyanka ah.
About The Author
