Dowladda Xabashida Itoobiya oo muddo badan ku taamaysay inay xoog ama xeelad kula wareegto qaybo ka mida badaha Soomaaliya, ayaa haatan diyaarisay ciidan cusub oo ay ugu talo-gashay inay ku qabsato xeebaha Soomaaliya.
R/Wasaare Abiy Axmed oo shalay khudbad ka jeediyey munaasibad ciidan oo ka qabsoontay magaalada Hawassa, ayaa shaaca ka qaaday dhismaha ciidan gaar ah oo uu sheegay inay ka hawl-geli doonaan xeebaha Badda cas ilaa xeebaha Soomaaliya.
Gaal Abiy Axmed, wuxuu sheegay in haatan ay ka guureen tababarradii dhulka iyo buuraha, isla markaana ay u wareegeen tababarrada badda. Isagoo ku ku nuuxnuuxsaday in ciidamada ay diyaariyeen ay awood u leeyihiin in ay ka dagaallami karaan dalalka deriska.
Abiy Axmed ayaa yiri “Laga soo bilaabo cirifka Soomaaliya ilaa cirifka Masawac, waxaan diyaar u nahay inaan taageerno sugidda ammaanka oo aan ka hor-tagno argagixisada badda. Sidoo kale waxaa naga go’an inaan hubinno horumarka iyo barwaaqada gobolkeena.
“Elite Force maaha ciidan keliya sugaya amniga Itoobiya, waa ciidan loogu talo-galay inay qayb ka qaataan hawl-gal kasta oo ka dhici kara gobolka, si loo xaqiijiyo amniga iyo nabadda gobolka, waxay ku hubaysan yihiin tiknoolajiyadda casriga ah, waxaana ka go’an gaarista iyo xaqiijinta hadafkooda. Maaha ciidan kaliya u taagan difaaca Itoobiya, waa ciidan difaac oo loogu talo-galay bariga Afrika, qaaradda Afrika iyo guud ahaanba gobolka. Waan ku faraxsannahay waanan soo dhaweynaynaa.”
Fagaaraha uu Abiy Axmed ka hadlayey oo ahayd munaasibad ciidan oo ka qabsoontay Taliska Hawlgallada Gaarka ah ee Itoobiya, ayaa sidoo kale lagu soo bandhigay hal-ku-dhegyo lagu xardhay erayo ay ka mid yihiin “Jeclaaw ama necbaaw, Itoobiya masii ahaan doonto dal aan bad lahayn”.
Hadalka Gaalkan, ayaa kusoo aadaya xilli Itoobiya ay xusul-duub ugu jirto sidii ay ku xayuubsan lahayd qaybo ka mida xeebaha Soomaaliya, iyadoo weliba xilligan doonaysa inay food-saaro ka dhigato hab-raacyo lagu sheegay heshiisyo ganacsi oo murtad Cirro uu shaaciyey in dhawaan uu la geli doono maamulka saliibiga ah ee Addis Ababa.
About The Author
