Jabhadda hubeysan ee qowmiyadda Axmaarada, ayaa sheegtay inay si buuxda ula wareegtay gacan ku haynta saddex magaalo oo istaraatiiji ah oo dhaca waqooyiga waddanka Itoobiya, halkaas oo ay si wayn kula loollameen ciidamada millatariga dowladda dhexe.
warbaahinta taabacsan jabhadda xoraynta dadka Axmaarada, waxay sheegtay in maleeshiyaad aad u hubeysan oo ka tirsan Fano ay dagaallo culus kaddib, la wareegeen gacan ku haynta saddex magaalo oo dhaca gobolkaasi, kuwaas oo ay maamulayeen maamullo ku xiran Abiy Axmed.
Magaalooyinka ay jabhadda Fano qabsatay waxaa ka mid ah Dangla Gojjam oo ah magaalo muhiim ah, muuqaallo ay ku faafiyeen bartooda Twitterka ayaa muujinayay magaalada oo haawanaysa, kaddib markii ay sheegeen inay isaga carareen ciidamadii millatariga ee gacanta ku hayay.
Dhanka kale, dowladda Itoobiya ayaa xirtay waddada dheer ee isku xirta magaalooyinka Bahirdar iyo Addis-ababa, ka dib markii ciidamadeeda laga fara maroojiyay saddexda magaalo, kooxda Fano ayaana u dabaal-degaysa guusha ay gaareen maleeshiyaadkeeda iyo magaalooyinka cusub ee ay gacanta ku dhigeen.
About The Author
