Faahfaahinno dheeraad ah ayaa kasoo baxaya shil gaari oo saacadihii lasoo dhaafay ka dhacay waddanka Koonfur Africa, halkaas oo ay dhimasho iyo dhaawac ku noqdeen ku dhawaad 40 qof oo ay Soomaali ku jiraan.
Shilkan oo ahaa mid xooggan ayaa u dhaxeeyay 2 baabuur oo Bus ah, kuwaas oo ku socdaalayay waddada N2 oo ah waddo wayn oo isku xirta deegaanka Danabay iyo degmada Mosselbaai ee ka tirsan gobolka western Cape ee dhaca waddanka Koonfur Africa.
Inta la xaqiijiyay waxaa shilkaasi baabuur ku dhintay 6 qof oo ay ku jirto haweenay Soomaali ah oo la oran jiray Raxmo Cismaan Dhicisow, halka ay sidoo kale ay shilkaasi ku dhaawacmeen 32 kale oo dhammaantood la socday gaadiidka isku dhacay.
Waxaa la rumeysan yahay in dadka dhintay ay ka mid yihiin wadeyaashii gaadiidka shilka galay, sida ay soo wariyeen dad goobjogeyaal ah.
Afhayeen u hadlay Booliska ayaa dhankiisa yiri “Warar aanu hayno waxay sheegayan in goobta loo diray ciidamo ka tirsan booliska kadib markii ay isku dhaceen labada bas, markii ay goobta tageen waxay heleen lix qof maydadka oo gaariga saarnaa kuwaas oo qabay dhaawacyo kala duwan, markii dambena waxaa goobta gaaray shaqaalaha gurmadka degdega ah dadka dhaawac qabana waxaa loo qaaday isbitaallada u dhow,”.
Gaariga Baska ah ee shilka galay ayaa lasoo wariyay in uu kasoo amba baxay magalada Cape Town ee caasimadda waddanka Koonfur Africa, isagoo kusii jeeday magaala xeebeedda port Elizabeth ee gobolka Eastern Cape.
About The Author
