Maamulka ashahaada la dirirka Puntland, ayaa shaaca ka qaaday in maleeshiyo aan ka tirsanayn maamulkaasi aan lagu arki karin deegaannada ay ka arrimiyaan.
Go’aanka maamulkan, ayaa yimid ka dib kulan maanta dhexmaray golaha wasiirada ee maamulka Ridada Puntland, waxaana kulankaasi shir guddoominayay Siciid Deni oo ah madaxa maamulkaasi.
Warsaxaafadeed kasoo baxay shirkan ayaa lagu sheegay in Puntland aysan qayb ka ahayn maleeshiyaadka kooxda Riddada Soomaaliya, ilaa heshiis laga gaaro arimaha ay labada dhinac isku hayaana uu sidaas sii ahaan doono go’aanka maamulkooda.
Bayaanka kasoo baxay golaha wasiirada maamulka Siciid Deni, ayaa ammar buuxa ku siiyay hay’adaha ammaanka maamulkaasi inaysan deegaannadooda ku sugnaan karin, sidoo kalena aan isaga gooshi karin gaadiid iyo maleeshiyo aan ahayn kuwa maamulka fadhigiisu yahay Garoowe.
Arintan, ayaa kusoo beegmaysa xilli ay isa soo tarayaan wararka la xiriira in kooxda Riddada Soomaaliya abaabulayso maleeshiyo ku sugan duleedka Garoowe, kuwaas oo la sheegay inay ku biirisay maleeshiyadeeda si ay ugu cadaadiso maamulka uu hoggaamiyo Siciid Deni.
About The Author
