Warbaahinada caalamiga ah ayaa aad u hadal haya fal wuxushnimo oo horleh oo maleeshiyaatka Kirishtanka ah si bareer ah uga geysteen dalka Afrikada dhexe kuna dileen dad aad u fara badan oo ka mid ah Muslimiinta laga tirada badan ee ku dhaqan dalkaasi.
Warbahinadan oo soo xiganaya ilo wareedyo maxali ah ayaa tilmaamaya in maleeshyaatka Kirishtanka ah ee Anti-Balaka ay dileen ugu yaraan 146 ruux oo Muslimiin ah ka dib xasuuq ba’an oo ay ka geysteen qeybo ka mid ah deegaanada ay ku nool yihiin Muslimiinta fara ku tiriska ah ee ku dhaqan dalkaasi.
TV-ga Al-Jazeera oo soo xiganaya ilo wareedyo gudaha ah ayaa tilmaamaya in la dilay ugu yaraan 146 ruux oo ka mid ah Muslimiinta Afrikada dhexe markii maleeshiyaatkan ay weerar xoogan ku qaadeen deegaan lagu magacaabo Bonboole oo ku yaall waqooyiga magaalada caasimada ah ee Baangi.
Wariyaha Al-Jazeera ayaa tilmaamaya in weerarka uu dhacay Arbacadii la soo dhaafay xilligaas oo maleeshiyaatka Nasaarada ee ku badan dalkaas ay ku duuleen tuulada ayna dileen cadad aad u badan oo Muslimiinta ka mid ah sababo ku aadan maqnaanshaha awood caalami ah oo ka tirsan quwadaha halkaas jooga oo ilaalisa Muslimiinta.
Wuxuu sidoo kale sheegay in sanadkan uu aad kordhay gumaadka iyo weerarada lagu beegsanayo Muslimiinta tirada yar ee ku nool Afrikada dhexe, isagoo tilmaamay in maleeshiyaatka Nasaarada ee fuliyey weerarkan ay ahaayeen isla kuwii maalma ka hor 25 ruux ku dilay Masjid ku yaalla deegaanka Koombi ee wadankaasi.
About The Author
